Read Buku Lopatulik 2 Samueli 1 Bible Online

2 Samueli 1 - Buku Lopatulik bible

2 Samueli 1

¹NDIPO kunali atamwalira Sauli, pamene Davide anabwera atawapha Aamaleki, ndipo Davide atakhala ku Zikilaga masiku awiri;

²pa tsiku lacitatu, onani, munthu anaturuka ku zithando za Sauli, ali ndi zobvala zace zong'ambika, ndi dothi pamutu pace; ndipo kunatero kuti iye, pofika kwa Davide, anagwa pansi namgwadira.

³Ndipo Davide ananena naye, Ufumira kuti iwe? iye nanena naye, Ndapulumuka ku zithando za Israyeti.

⁴Ndipo Davide ananena naye, Kunaonekanji? undiuze. Nayankha iye, Anthu anathawa kunkhondo, ndipo ambiri anagwa nafa; ndipo Sauli ndi Jonatani mwana wace anafanso.

⁵Ndipo Davide ananena ndi mnyamata wakumuuza, Udziwa bwang kuti Sauli ndi Jonatani mwana wace anafa?

⁶Mnyamata wakumuuzayo nati, Pamene ndinangoyenda pa phiri la Giliboa, ndinaona, Sauli alikuyedzamira nthungo yace, ndi magareta ndi apakavalo anamyandikiza.

⁷Ndipo iye pakuceukira m'mbuyo mwace anandiona, nanditana. Ndipo ndinayankha, Ndine.

⁸Nanena, Ndiwe yani? Ndipo ndinayankha kuti, Ndine M-amaleki.

⁹Ndipo anati kwa ine, Uime pa ine nundiphe, cifukwa kuwawa mtima kwandigwera ine, popeza ndikali moyobe.

¹⁰M'mwemo ndinakhala pambali pace ndi kumtsiriza cifukwa ndinadziwa kuti sangakhalenso ndi moyo wace, atagwa. Ndipo ndinatenga korona wa pamutu pace, ndi cigwinjiri ca pa mkono wace, ndabwera nazo kuno kwa mbuye wanga.

¹¹Pomwepo Davide anagwira zobvala zace nazing'amba; nateronso anthu onse okhala naye.

¹²Nabuma, nalira misozi, nasala kudya kufikira madzulo, cifukwa ca Sauli ndi mwana wace Jonatani, ndi anthu a Yehova, ndi banja la Israyeli, cifukwa adagwa ndi lupanga.

¹³Ndipo Davide ananena ndi mnyamata wakumuuzayo, Kwanu nkuti? Nayankha, Ine ndine mwana wa mlendo, M-amaleki.

¹⁴Ndipo Davide ananena naye, Bwanji sunaopa kusamula dzanja lako kuononga wodzozedwa wa Yehova?

¹⁵Davide naitana wina wa anyamatawo, nati, Sendera numkanthe, Ndipo anamkantha, nafa iye.

¹⁶Koma asanafe, Davide adanena naye, Wadziphetsa ndi mtima wako; cifukwa pakamwa pako padacita umboni wakukutsutsa ndi kuti, Ine ndinapha wodzozedwa wa Yehova.

¹⁷Ndipo Davide analirira Sauli ndi Jonatani mwana wace ndi nyimbo iyi ya maliro;

¹⁸nawauza aphunzitse ana Ayuda nyimbo iyi ya Uta, onani inalembedwa m'buku la Jasari:-

¹⁹Ulemerero wako, Israyeli, unaphedwa pa misanje yako. Ha! adagwa amphamvu

²⁰Usacinene ku Gati, Usacibukitse m'makwalala a Asikeloni, Kuti ana akazi a Afilisti angasekere, Kuti ana akazi a osadulidwawo angapfuule mokondwera.

²¹Mapiri inu a Giliboa, Pa inu pasakhale mame kapena mvula, kapena minda yakutengako zopereka. Pakuti kumeneko zikopa za amphamvu zinatayika koipa, Cikopa ca Sauli, monga ca wosadzozedwa ndi mafuta.

²²Uta wa Jonatani sunabwerera, Ndipo lupanga la Sauli silinabwecera cabe, Pa mwazi wa ophedwa, pa mafuta a amphamvuwo.

²³Sauli ndi Jonatani anali okoma ndi okondweretsa m'miyoyo yao, Ndipo m'imfa yao sanasiyana; Anali nalo liwiro loposa ciombankanga, Anali amphamvu koposa mikango.

²⁴Ana akazi inu a Israyeli, mulirire Sauli, Amene anakubvekani ndi zofira zokometsetsa, Amene anaika zokometsetsa zagolidi pa zobvala zanu.

²⁵Ha! amphamvuwo anagwa pakati pa nkhondo! Jonatani anaphedwa pamisanje pako.

²⁶Ndipsinjika mtima cifukwa ca iwe, mbale wanga Jonatani; Wandikomera kwambiri; Cikondi cako, ndinadabwa naco, Cinaposa cikondi ca anthu akazi.

²⁷Ha! amphamvuwo anagwa, Ndi zida za nkhondo zinaonengeka,