Read Buku Lopatulik Yobu 10 Bible Online

Yobu 10 - Buku Lopatulik bible

Yobu 10

¹Mtima wanga ulema nao moyo wanga, Ndidzadzilolera kudandaula kwanga, Ndidzalankhula pakuwawa mtima wanga.

²Ndidzati kwa Mulungu, Musanditsutse; Mundidziwitse cifukwa ca kutsutsana nane.

³Cikukomerani kodi kungosautsa, Kuti mupeputsa nchito yolemetsa manja anu, Ndi kuti muwalira pa uphungu wa oipa?

⁴Muli nao maso a thupi kodi? Mupenya kodi monga umo apenyera munthu?

⁵Masiku anu akunga masiku a munthu kodi, Zaka zanu zikunga masiku a munthu;

⁶Kuti mufunsa mphulupulu yanga, Ndi kulondola coipa canga;

⁷Cinkana mudziwa kuti sindiri woipa, Ndipo palibe wakupulumutsa m'dzanja lanu?

⁸Manja anu anandiumba, nandiulunga monsemu, Koma mufuna kundiononga.

⁹Mukumbukile kuti mwandiumba ngati dothi; Ndipo kodi mudzandibwezera kupfumbi?

¹⁰Simunanditsanula kodi ngati mkaka, Ndi kundilimbitsa ngati mase?

¹¹Munandibveka khungu ndi mnofu, Ndi kundilumikiza mafupa ndi mitsempha,

¹²Mwandipatsa moyo, ndi kundikomera mtima, Ndi masamalidwe anu anasunga mzimu wanga.

¹³Koma izi munazibisa mumtima mwamu; Ndidziwa kuti ici muli naco:

¹⁴Ndikacimwa mundipenya; Ndipo simudzandimasula mphulupulu yanga.

¹⁵Ndikakhala woipa, tsoka ine; Ndikakhala wolungama, sindidzakweza mutuwanga; Ndadzazidwa ndi manyazi, Koma penyani kuzunzika kwanga.

¹⁶Ndipo mutu wanga ukadzikweza, mundisaka ngati mkango; Mubweranso ndi kudzionetsera modabwiza kwa ine.

¹⁷Mundikonzeranso mboni zonditsutsa, Ndi kundicurukitsira mkwiyo wanu; Nkhondo yobwereza-bwereza yandigwera.

¹⁸Potero munandibadwitsa cifukwa ninji? Mwenzi nditapereka moyo wanga, lisanandione diso.

¹⁹Ndikadakhala monga ngati sindikadakhala; Akadanditenga pobadwapo kumka nane kumanda.

²⁰Masiku anga satsala owerengeka nanga? lindani, Bandilekani kuti nditsitsimuke pang'ono,

²¹Ndisanacoke kumka kumene sindikabweranso, Ku dziko la mdima ndi la mthunzi wa imfa;

²²Dziko la mdima bii ngati mdima wandiweyani, Dziko la mthunzi wa imfa losalongosoka, Kumene kuunika kukunga mdima.