Read Buku Lopatulik Yobu 11 Bible Online

Yobu 11 - Buku Lopatulik bible

Yobu 11

¹Pamenepo anayankha Zofari wa ku Naama, nati,

²Kodi mau ocurukawa sayenera kuwayankha? Ndi munthu wa milomo ayenera kuyesedwa wolungama?

³Kodi zotamanda zako ziwatseke anthu pakamwa? Useka kodi, wopanda munthu wakukucititsapo manyazi?

⁴Pakuti unena, Ciphunzitso canga ncoona, Ndipo ndiri woyera pamaso pako.

⁵Koma, hal mwenzi atanena Mulungu, Ndi kukutsegulira milomo yace motsutsa;

⁶Nakufotokozere zinsinsi za nzeru, Popeza zipindika-pindika macitidwe ao! Cifukwa cace dziwa kuti Mulungu akuiwalira mphulupulu zina.

⁷Kodi ukhoza kupeza Mulungu mwa kufunafuna? Ukhoza kupeza Wamphamvuyonse motsindika?

⁸Kumpeza kutalika ngati kumwamba, ungacitenji? Kuzama ngati kumanda, ungadziwenji?

⁹Muyeso wace utalikira utali wace wa dziko lapansi, Citando cace ciposa ca nyanja.

¹⁰Akapita, nakatsekera, Nakaturutsa bwalo la mlandu, adzamletsa ndani?

¹¹Pakuti adziwa anthu opanda pace, Napenyanso mphulupulu, ngakhale saisamalira.

¹²Koma munthu wopanda pace asowa nzeru, Ngakhale munthu abadwa ngati mwana wa mbidzi.

¹³Ukakonzeratu mtima wako, Ndi kumtambasulira Iye manja ako;

¹⁴Mukakhala mphulupulu m'dzanja lako, uicotseretu kutali, Ndi cisalungamo cisakhale m'mahema mwako;

¹⁵Popeza pamenepo udzakweza nkhope yako opanda banga; Nudzalimbika osacita mantha;

¹⁶Pakuti udzaiwala cisoni cako, Udzacikumbukila ngati madzi opita;

¹⁷Ndipo moyo wako udzayera koposa usana; Kungakhale kuli mdima kudzakhala ngati m'mawa.

¹⁸Ndipo udzalimbika mtima popeza pali ciyembekezo; Nudzafunafuna, ndi kugona mosatekeseka,

¹⁹Inde udzagona pansi, wopanda wina wakukunjenjemeretsa, Ndipo ambiri adzakupembedza,

²⁰Koma maso a oipa adzagoma, Ndi pothawirapo padzawasowa, Ndipo ciyembekezo cao ndico kupereka mzimu wao.