Read Buku Lopatulik Yobu 12 Bible Online

Yobu 12 - Buku Lopatulik bible

Yobu 12

¹Pamenepo Yobu anayankha, nati,

²Zoonadi inu ndinu anthu, Ndi nzeru idzafa pamodzi ndi inu.

³Koma inenso ndiri nayo nzeru monga inu. Sindingakucepereni; Ndani sadziwa zonga izi?

⁴Ndine ngati munthu wosekedwa ndi mnansi wace, Ndinaitana kwa Mulungu, ndipo anandiyankha; Munthu wolungama wangwiro asekedwa.

⁵Munthu wosatekeseka apeputsa tsoka mumtima mwace, Limlindira woterereka mapazi ace.

⁶Mahema a acifwamba akhala mumtendere, Ndi iwo oputa Mulungu alimbika mtima: Amene Mulungu amadzazira dzanja lao.

⁷Tafunsira tsono kwa nyamazo, zidzakulangiza, Ndi mbalame za m'mlengalenga, zidzakuuza;

⁸Kapena ulankhule ndi dziko lapansi, lidzakulangiza; Ndi nsomba za kunyanja, zidzakufotokozera,

⁹Ndaniyo sadziwa nazo izi zonse; Kuti dzanja la Yehova licita ici?

¹⁰M'dzanja mwace muli mpweya wa zamoyo zonse, Ndi mzimu wa munthu ali yense.

¹¹M'khutumu simuyesa mau, Monga m'kamwa mulawa cakudya cace?

¹²Kwa okalamba kuli nzeru, Ndi kwa a masiku ocuruka luntha.

¹³Kwa Iye kuli nzeru ndi mphamvu; Uphungu ndi luntha ali nazo.

¹⁴Taona, agamula, ndipo palibe kumanganso; Amtsekera munthu, ndipo palibe kumtsegulira,

¹⁵Taona atsekera madzi, naphwa; Awatsegulira, ndipo akokolola dziko lapansi.

¹⁶Kwa Iye kuli mphamvu ndi nzeru. Wonyengedwa ndi wonyenga yemwe ali ace.

¹⁷Apita nao maphungu atawafunkhira, Napulukiritsa oweruza milandu.

¹⁸Amasula comangira ca mafumu, Nawamangira nsinga m'cuuno mwao.

¹⁹Apita nao, ansembe atawafunkhica, Nagubuduza amphamvu.

²⁰Amcotsera wokhulupirika kunena kwace. Nalanda luntha la akulu.

²¹Atsanulira mnyozo pa akalonga, Nawasezera olimba lamba lao.

²²Abvumbulutsa zozama mumdima, Naturutsa mthunzi wa imfa ukhale poyera;

²³Acurukitsa amitundu, nawaononganso; Abalalikitsa amitundu, nawabwezanso.

²⁴Awacotsera akulu a anthu a padziko mtima wao, Nawasokeretsa m'cipululu copanda njira.

²⁵Iwo ayambasa mumdima mopanda kuunika, Ndipo awayendetsa dzandi dzandi.