Read Buku Lopatulik Yobu 13 Bible Online

Yobu 13 - Buku Lopatulik bible

Yobu 13

¹Taonani; diso langa laciona conseci; M'khutu mwanga ndacimva ndi kucizindikira.

²Cimene mucidziwa inu, inenso ndicidziwa; Sindikuceperani.

³Koma ine ndidzanena ndi Wamphamvuyonse, Ndipo ndifuna kudzikanira kwa Mulungu.

⁴Koma inu ndinu opanga zabodza, Asing'anga opanda pace inu nonse.

⁵Mwenzi mutakhala cete konse, Ndiko kukadakhala nzeru zanu.

⁶Tamvani tsono kudzikanira kwanga, Tamverani kudzinenera kwa milomo yanga.

⁷Kodi munenera Mulungu mosalungama, Ndi kumnenera Iye monyenga?

⁸Kodi mukhalira kumodzi ndi Iye? Mundilimbirana mwa Mulungu.

⁹Ncokoma kodi kuti Iye akusanthuleni? Kodi mudzamnyenga Iye monga munyenga munthu?

¹⁰Adzakudzudzulani ndithu, Mukacita tsankhu m'tseri.

¹¹Ukulu wace sukucititsani mantha, Ndi kuopsa kwace sikukugwerani kodi?

¹²Zikumbutso zanu ndizo miyambi ya mapulusa; Zodzikanira zanu zikunga malinga adothi.

¹³Khalani cete, ndilekeni, kuti ndinene, Condifikira cifike.

¹⁴Ndilumirenji mnofu wanga pamano panga, Ndi kupereka moyo wanga m'dzanja langa?

¹⁵Angakhale andipha koma ndidzamlindira; Komanso ndidzaumirira mayendedwe anga pamaso pace.

¹⁶Iye adzakhalanso cipulumutso canga, Pakuti wonyoza Mulungu sadzafika pamaso pace.

¹⁷Mvetsetsani mau anga, Ndi kunenetsa kwanga kumveke m'makutu mwanu.

¹⁸Taonani tsono, ndalongosola mlandu wanga; Ndidziwa kuti adzandimasula ndiri wolungama,

¹⁹Ndaniyo adzatsutsana nane? Ndikakhala cete, ndidzapereka mzimu wanga.

²⁰Zinthu ziwiri zokha musandicitire, Pamenepo sindidzabisalira nkhope yanu:

²¹Mundicotsere dzanja lanu kutali, Ndi kuopsa kwanu kusandicititse mantha.

²²Pamenepo muitane, ndipo ndidzayankha; Kapena ndinene ndine, ndipo mundiyankhe ndinu.

²³Mphulupulu zanga ndi zocimwa zanga ndi zingati? Mundidziwitse kulakwa kwanga ndi cimo langa,

²⁴Mubisiranji nkhope yanu, Ndi kundiyesa mdani wanu?

²⁵Kodi mudzaopsa tsamba lakungouluka, Ndi kulondola ziputu zouma?

²⁶Pakuti mundilembera zinthu zowawa, Ndi kundipatsa ngati colowa mphulupulu za ubwana wanga.

²⁷Mulonganso mapazi anga m'zigologolo, ndi kupenyerera mayendedwe anga onse; Mudzilembera malire mopanika mapazi anga;

²⁸Momwemo munthu akutha ngati cinthu coola, Ngati cobvala codyedwa ndi numbi