Read Buku Lopatulik Yobu 15 Bible Online

Yobu 15 - Buku Lopatulik bible

Yobu 15

¹Pamenepo Elifazi wa ku Temani anayankha, nati,

²Kodi mwini nzeru ayankhe ndi kudziwa kouluzika, Ndi kudzaza mimba yace ndi mphepo ya kum'mawa?

³Kodi atsutsane ndi mnzace ndi mau akusathandiza? Kapena ndi maneno akusaphindulitsa?

⁴Zedi uyesa cabe mantha, Nucepsa cilingiriro pamaso pa Mulungu.

⁵Pakuti pakamwa pako paphunzitsa mphulupulu zako, Nusankha lilime la ocenjerera.

⁶Pakamwa pako pakutsutsa, si ine ai. Inde milomo yako ikucitira umboni wakukutsutsa.

⁷Kodi ndiwe munthu woyamba kubadwa? Kapena unayamba kulengedwa ndiwe, osati mapiri?

⁸Kodi unamva uphungu wacinsinsi wa Mulungu? Ndipo unadzikokera nzeru kodi?

⁹Udziwa ciani, osacidziwa ife? Uzindikira ciani, cosakhala mwa ife?

¹⁰Pakati pa ife pali aimvi, ndi okalambitsa, Akuposa atate wako masiku ao,

¹¹Masangalatso a Mulungu akucepera kodi? Kapena uli naco cinsinsi kodi?

¹²Mtima wako usonthokeranji nawe? Maso ako aphethira-phethira cifukwa ninji?

¹³Kuti utembenuza mzimu wako utsutsane ndi Mulungu, Ndi kulola mau otere aturuke m'kamwa mwako.

¹⁴Munthu nciani kuti akhale woyera, Wobadwa ndi mkazi kuti akhale wolungama?

¹⁵Taona, Mulungu sakhulupirira opatulika ace; Ngakhale m'mwamba simuyera pamaso pace,

¹⁶Koposa kotani nanga munthu wonyansa ndi wodetsa, Wakumwa cosalungama ngati madzi.

¹⁷Ndidzakuonetsa, undimvere; Cimene ndinaciona, ndidzakufotokozera;

¹⁸Cimene adacinena anzeru, Adacilandira kwa makolo ao, osacibisa;

¹⁹Ndiwo amene analandira okha dzikoli, Wosapita mlendo pakati pao;

²⁰Munthu woipa adzipweteka masiku ace onse, Ndi zaka zowerengeka zisingikira woopsa.

²¹M'makutu mwace mumveka zoopsetsa; Pali mtendere amfikira wakumuononga.

²²Sakhulupirira kuti adzaturukamo mumdima, Koma kuti lupanga limlindira;

²³Ayendayenda ndi kufuna cakudya, nati, Ciri kuti? Adziwa kuti lamkonzekeratu pafupi tsiku lamdima,

²⁴Nsautso ndi cipsinjo zimcititsa mantha, Zimlaka ngati mfumu yokonzekeratu kunkhondo;

²⁵Pakuti amtambasula dzanja lace moyambana ndi Mulungu, Napikisana ndi Wamphamvuyonse.

²⁶Amthamangira Iye mwaliuma, Ndi zikopa zace zocindikira.

²⁷Popeza anakuta nkhope yace ndi kunenepa kwace, Nacita mafunyenye a mafuta m'zuuno zace;

²⁸Adzakhala m'midzi yopasuka, M'nyumba zosakhalamo munthu, Zoti zisandulika muunda.

²⁹Sadzakhala wolemera, ndi cuma cace sicidzakhalitsa, Ndi zipatso zace sizidzacuruka padziko.

³⁰Sadzacoka mumdima; Lawi la moto lidzaumitsa nthambi zace; Ndipo adzacoka ndi mpumo wa m'kamwa mwace.

³¹Asatame zopanda pace, kudzinyenga nazo; Pakuti zopanda pace zidzakhala combwezera cace.

³²Cidzacitika isanadze nthawi yace; Pakuti nthambi yace siidzaphuka.

³³Adzayoyoka zipatso zace zosapsa ngati mpesa, Nadzathothoka maluwa ace ngati mtengo wazitona.

³⁴Pakuti msonkhano wa onyoza Mulungu udzakhala cumba, Ndi moto udzapsereza mahema a olandira cokometsera mlandu.

³⁵Aima ndi cobvuta, nabala mphulupulu, Ndi m'mimba mwao mukonzeratu cinyengo.