Read Buku Lopatulik Yobu 19 Bible Online

Yobu 19 - Buku Lopatulik bible

Yobu 19

¹Koma Yobu anayankha, nati,

²Mudzasautsa moyo wanga kufikira liti, Ndi kundityolatyola nao mau?

³Kakumi aka mwandicititsa manyazi; Mulibe manyazi kuti mundiumira mtima.

⁴Ndipo ngati ndalakwa ndithu, Kulakwa kwanga kuli ndi ine ndekha.

⁵Ngati inu mudzikuza ndithu pa ine, Ndi kundichulira mtonzo wanga kuti munditsutse nao;

⁶Dziwani tsopano kuti Mulungu wandikhotetsera mlandu wanga, Nandizinga ndi ukonde wace.

⁷Taonani, ndipfuula kuti, Ciwawa! koma sandimvera; Ndikuwa, koma palibe ciweruzo.

⁸Iye ananditsekera njira kuti ndisapitireko, Naika mdima poyendapo ine.

⁹Anandibvula ulemerero wanga, Nandicotsera korona pamutu panga,

¹⁰Nandigamula ponsepo, ndipo ndamukatu; Nacizula ciyembekezo canga ngati mtengo.

¹¹Wandiyatsiranso mkwiyo wace, Nandiyesera ngati wina wa adani ace.

¹²Ankhondo ace andidzera pamodzi, nandiundira njira yao, Nandimangira misasa pozinga hema wanga.

¹³Iye anandicotsera abale anga kutali, Ndi odziwana nane andiyesa mlendo konse.

¹⁴Anansi anga andisowa, Ndi odziwana nane bwino andiiwala.

¹⁵Iwo a m'nyumba mwanga ndi adzakazi anga andiyesa mlendo; Ndine wacilendo pamaso pao.

¹⁶Ndikaitana kapolo wanga, sandibwezera mau, Cinkana ndimpembedza pakamwa panga.

¹⁷Mpweya wanga unyansira mkazi wanga, Cinkana ndinampembedza ndi kuchula ana a thupi langa.

¹⁸Angakhale ana ang'ono andipeputsa, Ndikanyamuka, andinena;

¹⁹Mabwenzi anga eni eni onse anyansidwa nane; Ndi onse ndakondana nao asandulika adani anga.

²⁰Pfupa langa laumirira pa khungu langa ndi mnofu wanga, Ndipo ndapulumuka ndiri nazo nkhama za mano anga.

²¹Ndicitireni cifundo, ndicitireni cifundo, mabwenzi anga inu; Pakuti dzanja la Mulungu landikhudza.

²²Mundilondola bwanji ngati Mulungu, Losakukwanirani thupi langa?

²³Ha! akadalembedwa mau anga! Ha! akadalembedwa m'buku!

²⁴Akadawazokota pathanthwe cikhalire, Ndi cozokotera cacitsulo ndi kuthira ntobvu!

²⁵Koma ndidziwa kuti Mombolo wanga ali ndi moyo, Nadzauka potsiriza papfumbi.

²⁶Ndipo khungu langa litaonongeka, Pamenepo wopanda thupi langa, ndidzapenya Mulungu;

²⁷Amene ndidzampenya ndekha, Ndi maso anga adzamuona, si wina ai. Imso zanga zatha m'kati mwanga.

²⁸Mukati, Tiyeni timlondole! Popeza cifukwa ca mlandu capezeka mwa ine;

²⁹Mucite nalo mantha lupanga; Pakuti mkwiyo utenga zolakwa za lupanga, Kuti mudziwe pali ciweruzo.