Read Buku Lopatulik Yobu 20 Bible Online

Yobu 20 - Buku Lopatulik bible

Yobu 20

¹Pamenepo anayankha Zofari Mnaama, nati,

²M'mwemo zolingirira zanga zindiyankha, Cifukwa cace ndifulumidwa m'kati mwanga.

³Ndamva kudzudzula kwakundicititsa manyazi, Ndi mzimu wa nzeru yanga undiyankha.

⁴Kodi sucidziwa ici ciyambire kale lomwe, Kuyambira anaika munthu pa dziko lapansi,

⁵Kuti kupfuula kokondwera kwa woipa sikukhalira kutha, Ndi cimwemwe ca wonyoza Mulungu cikhala kamphindi?

⁶Cinkana ukulu wace ukwera kumka kuthambo, Nugunda pamitambo mutu wace;

⁷Koma adzatayika kosatha ngati zonyansa zace; Iwo amene adamuona adzati, Ali kuti iye?

⁸Adzauluka ngati loto, osapezekanso; Nadzaingidwa ngati masomphenya a usiku.

⁹Diso lidamuonalo silidzamuonanso; Ndi malo ace sadzampenyanso.

¹⁰Ana ace adzapempha aumphawi awakomere mtima; Ndi manja ace adzabweza cuma cace.

¹¹Mafupa ace adzala nao unyamata wace, Koma udzagona naye pansi m'pfumbi.

¹²Cinkana coipa cizuna m'kamwa mwace, Cinkana acibisa pansi pa lilime lace;

¹³Cinkana acisunga, osacileka, Naoikhalitsa m'kamwa mwace;

¹⁴Koma cakudya cace cidzasandulika m'matumbo mwace, Cidzakhala ndulu ya mphiri mkati mwace.

¹⁵Anacimeza cuma koma adzacisanzanso; Mulungu adzaciturutsa m'mimba mwace.

¹⁶Adzayamwa ndulu ya mphiri; Pakamwa pa njoka padzamupha.

¹⁷Sadzapenyerera timitsinje, Toyenda nao uci ndi mafuta.

¹⁸Cimene adagwiriraco nchito, adzacibweza, osacimeza; Sadzakondwera monga mwa zolemera zace adaziona.

¹⁹Pakuti anapsinja, nasiya aumphawi; Analanda nyumba mwaciwawa, imene sanaimanga.

²⁰Popeza sanadziwa kupumula m'kati mwace, Sadzalanditsa kanthu ka zofunika zace.

²¹Sikunatsalira kanthu kosadya iye, Cifukwa cace zokoma zace sizidzakhalitsa.

²²Pomkwanira kudzala kwace adzakhala m'kusauka; Dzanja la yense wobvutika lidzamgwera,

²³Poti adzaze mimba yace, Mulungu adzamponyera mkwiyo wace waukali, Nadzambvumbitsira uwu pakudya iye.

²⁴Adzathawa cida cacitsulo, Ndi mubvi wa uta wamkuwa udzampyoza.

²⁵Auzula, nuturuka m'thupi mwace; Inde nsonga yonyezimira ituruka m'ndulu mwace; Zamgwera zoopsa.

²⁶Zamdima zonse zimsungikira zikhale cuma cace, Moto wosaukoleza munthu udzampsereza; Udzatha wotsalira m'hema mwace.

²⁷M'mwamba mudzabvumbulutsa mphulupulu yace, Ndi dziko lapansi lidzamuukira.

²⁸Phindu la m'nyumba mwace lidzacoka, Akatundu ace adzamthawa tsiku la mkwiyo wace.

²⁹Ili ndi gawo la munthu woipa, locokera kwa Mulungu, Ndi colowa amuikiratu Mulungu.