Read Buku Lopatulik Yobu 21 Bible Online

Yobu 21 - Buku Lopatulik bible

Yobu 21

¹Pamenepo Yobu anayankha, nati,

²Mvetsetsani mau anga; Ndi ici cikhale citonthozo canu.

³Mundilole, ndinene nanenso; Ndipo nditanena ine, sekani.

⁴Kodi ine, kudandaula kwanga, ndidandaulira munthu? Ndipo ndilekerenji kupsa mtima?

⁵Ndiyang'anireni, nimusumwe, Gwirani pakamwa panu.

⁶Ndikangokumbukila ndibvutika mtima, Ndi thupi langa licita nyau nyau.

⁷Oipa akhaliranji ndi moyo, Nakalamba, nalemera kwakukuru?

⁸Mbeu zao zikhazikika pamodzi nao pankhope pao, Ndi ana ao pamaso pao,

⁹Nyumba zao sizitekeseka ndi mantha, Ngakhale ndodo ya Mulungu siiwakhalira.

¹⁰Ng'ombe yao yamphongo imakwera, yosakanika; Ng'ombe yao yaikazi imaswa, yosapoloza.

¹¹Aturutsa makanda ao ngati gulu, Ndi ana ao amabvinabvina.

¹²Ayimbira lingaka ndi zeze, Nakondwera pomveka citoliro.

¹³Atsekereza masiku ao ndi zokoma, Natsikira m'kamphindi kumanda.

¹⁴Koma adati kwa Mulungu, Ticokereni; Pakuti sitifuna kudziwa njira zanu.

¹⁵Wamphamvuyonse ndiye yani kuti timtumikire? Ndipo tidzapindulanji pakumpemphera Iye?

¹⁶Taonani, zokoma zao siziri m'dzanja lao; (Koma uphungu wa oipa unditalikira.)

¹⁷Ngati nyali za oipa zizimidwa kawiri kawiri? Ngati tsoka lao liwagwera? Ngati Mulungu awagawira zowawa mu mkwiyo wace?

¹⁸Ngati akunga ziputu zomka ndi mphepo, Ngati mungu wouluzika ndi nkuntho?

¹⁹Mukuti, Mulungu asungira ana ace a munthu coipa cace, Ambwezere munthuyo kuti acidziwe.

²⁰Aone yekha cionongeko cace m'maso mwace, Namwe mkwiyo wa Wamphamvuyonse.

²¹Pakuti comsamalitsa nyumba yace nciani, atapita iye, Ciwerengo ca miyezi yace citadulidwa pakati?

²²Ngati pali munthu wakumphunzitsa Mulungu nzeru? Popeza Iye aweruza mlandu iwo okwezeka.

²³Wina akufa, wabiriwiri, Ali cikhalire ndi cipumulire.

²⁴Mbale zace zidzala ndi mkaka; Ndi wongo wa m'mafupa ace uli momwe.

²⁵Koma mnzace akufa ali nao mtima wakuwawa, Osalawa cokoma konse.

²⁶Iwo agona cimodzimodzi kupfumbi, Ndi mphutsi ziwakuta.

²⁷Taonani, ndidziwa maganizo anu, Ndi ciwembu mundilingirira moipa,

²⁸Pakuti munena, Iri kuti nyumba ya kalonga? Ndi hema wokhalamo woipa ali kuti?

²⁹Simunawafunsa kodi opita m'njira? Ndipo simusamalira zotsimikiza zao?

³⁰Zakuti munthu woipa asungika tsiku la tsoka? Naturutsidwa tsiku la mkwiyo?

³¹Adzamfotokozera ndani njira yace pamaso pace? Nadzamlipitsa ndani pa ici anacicita?

³²Potsiriza pace adzapita naye kumanda, Nadzadikira pamanda pace,

³³Zibuma za kucigwa zidzamkomera. Adzakoka anthu onse amtsate, Monga anamtsogolera osawerengeka.

³⁴Potero munditonthozeranji nazo zopanda pace, Popeza m'mayankho mwanu mutsala mabodza okha?