Read Buku Lopatulik Yobu 22 Bible Online

Yobu 22 - Buku Lopatulik bible

Yobu 22

¹Pamenepo Elifazi wa ku Temani anayankha, nati,

²Kodi munthu apindulira Mulungu? Koma wanzeru angodzipindulira yekha.

³Kodi Wamphamvuyonse akondwera nako kuti iwe ndiwe wolungama? Kapena kodi apindula nako kuti ukwaniritsa njira zako?

⁴Kodi akudzudzula, nadza nawe kumlandu, Cifukwa ca kumuopa kwako?

⁵Zoipa zako sizicuruka kodi? Ndi mphulupulu zako sizikhala zosawerengeka kodi?

⁶Pakuti wamtenga cikole kwa mbale wako wopanda cifukwa, Ndi kubvula ausiwa zobvala zao.

⁷Sunampatsa wolema madzi amwe, Ndi wanjala unammana cakudya.

⁸Koma munthu mwini mphamvu, dziko ndi lace; Ndi munthu wobvomerezeka, anakhala momwemo.

⁹Unabweza akazi amasiye osawaninkha kanthu, Ndi manja a ana amasiye anatyoledwa.

¹⁰Cifukwa cace misampha ikuzinga. Ndi mantha akubvuta modzidzimutsa,

¹¹Kapena mdima kuti ungaone, Ndi madzi aunyinji akumiza.

¹²Kodi Mulungu sakhala m'mwamba m'tali? Ndipo penyani kutalika kwace kwa nyenyezi, ziri m'talitali.

¹³Ndipo ukuti, Adziwa ciani Mulungu? Aweruza kodi mwa mdima wa bii?

¹⁴Mitambo ndiyo comphimba, kuti angaone; Ndipo amayenda pa thambo lakumwamba.

¹⁵Udzasunga kodi njira yakale, Anaiponda anthu amphulupulu?

¹⁶Amene anakwatulidwa isanafike nyengo yao, Cigumula cinakokolola kuzika kwao;

¹⁷Amene anati kwa Mulungu, Ticokereni; Ndipo, Angaticitire ciani Wamphamvuyonse?

¹⁸Angakhale Iye adadzaza nyumba zao ndi zabwino; Koma uphungu wa oipa unditalikira.

¹⁹Olungama aciona nakondwera; Ndi osalakwa awaseka pwepwete,

²⁰Ndi kuti, Zoonadi, otiukirawo alikhidwa, Ndi zowatsalira, moto unazipsereza.

²¹Uzolowerane ndi Iye, nukhale ndi mtendere; Ukatero zokoma zidzakudzera,

²²Landira tsono cilamulo pakamwa pace, Nuwasunge maneno ace mumtimamwako.

²³Ukabweranso kwa Wamphamvuyonse, udzamanga bwino; Ukacotsera cosalungama kutali kwa mahema ako.

²⁴Ndipo utaye cuma cako kupfumbi, Ndi golidi wa ku ofiri ku miyala ya kumitsinje.

²⁵Ndipo Wamphamvuyonse adzakhala cuma cako, Ndi ndarama zako zofunika.

²⁶Pakuti pamenepo udzakondwera naye Wamphamvuyonse, Ndi kuweramutsa nkhope yako kwa Mulungu.

²⁷Udzampemphera ndipo adzakumvera; Nudzatsiriza zowinda zako.

²⁸Ukatsimikiza mtima kakuti, kadzakhazikikira iwe; Ndi kuunika kudzawala pa njira zako.

²⁹Anthu akakugwetsa pansi, udzati, Adzandikweza; Ndipo adzapulumutsa wodzicepetsayo.

³⁰Adzamasula ngakhale woparamula, Inde adzamasuka mwa kuyera kwa manja ako.