Read Buku Lopatulik Yobu 24 Bible Online

Yobu 24 - Buku Lopatulik bible

Yobu 24

¹Wamphamvuyonse alekeranji kuikiratu nyengo? Ndi iwo omdziwa alekeranji kudziwa masiku ace?

²Alipo akusendeza malire; Alanda gulu la zoweta, nazidyetsa.

³Akankhizira kwao buru wa amasiye, Atenga ng'ombe ya mfedwa ikhale cikole.

⁴Apambukitsa aumphawi m'njira; Osauka a padziko abisala pamodzi.

⁵Taonani, ngati mbidzi za m'cipululu Aturukira ku nchito zao, nalawirira nkufuna cakudya; Cipululu ciwaonetsera cakudya ca ana ao.

⁶Atema dzinthu zao m'munda; Natola khunkha m'munda wampesa wa woipa.

⁷Agona amarisece usiku wonse opanda cobvala, Alibe copfunda pacisanu.

⁸Abvumbwa ndi mvula kumapiri, Nafukata thanthwe posowa pousapo.

⁹Akwatula wamasiye kubere, Natenga cikole cobvala ca osauka;

¹⁰Momwemo ayenda amarisece opanda cobvala, Nasenza mtolo wa dzinthu ali ndi njala.

¹¹M'kati mwa malinga a iwo aja ayenga mafuta; Aponda mphesa moponderamo, namva ludzu.

¹²M'mudzi waukuru anthu abuula alinkufa; Ndi moyo wa iwo olasidwa upfuula; Koma Mulungu sasamalira coipaco.

¹³Iwo ndiwo amene apikisana nako kuunika, Sadziwa njira zace, Sasunga mayendedwe ace.

¹⁴Kukaca auka wambanda, napha wosauka ndi waumphawi; Ndi usiku asanduka mbala.

¹⁵Ndipo diso la wacigololo liyombekezera cisisira, Ndi kuti, Palibe diso lidzandiona; Nabvala cophimba pankhope pace.

¹⁶Kuli mdima aboola nyumba, Usana adzitsekera, Osadziwa kuunika.

¹⁷Pakuti iwo onse auyesa m'mawa mthunzi wa imfa; Pakuti adziwa zoopsa za mthunzi wa imfa.

¹⁸Atengedwa ngati coyandama pamadzi; Gawo lao litembereredwa padziko; Sadzalunjikanso njira ya minda yamphesa.

¹⁹Cirala ndi dzuwa zitha madzi a cipale cofewa, Momwemo manda acita nao ocimwa.

²⁰M'mimba mudzamuiwala; mphutsi zidzamudya mokondwera. Sadzamkumbukilanso; Ndipo cosalungama cidzatyoledwa ngati mtengo.

²¹Alusira cumba wosabala, Osamcitira wamasiye cokoma.

²²Mulungu awakhalitsa amphamvu mwa mphamvu yace; Iwo aukanso m'mene anayesa kuti sadzakhala ndi moyo.

²³Awalola akhale osatekeseka, ndipo alimbikapo; Koma maso ace ali pa njira zao.

²⁴Akwezeka; m'kamphindi kuti zi; Inde atsitsidwa, acotsedwa monga onse ena, Adutidwa ngati tirigu ngala zace.

²⁵Ndipo ngati si kutero, anditsutsa ndani kuti ndiri wabodza, Ndi kuyesa mau anga opanda pace?