Read Buku Lopatulik Yobu 28 Bible Online

Yobu 28 - Buku Lopatulik bible

Yobu 28

¹Koma kuli mtapo wa siliva, Ndi malo a golidi amene amuyenga.

²Citsulo acitenga m'nthaka, Ndi mkuwa ausungunula kumwala.

³Munthu athawitsa mdima, Nafunafuna mpaka malekezero onse, Miyala ya mdima wa bii ndi ya mthunzi wa imfa.

⁴Aboola mgodi posiyana patali pokhala anthu; Aiwalika ndi phazi lopitapo; Apacikika kutali ndi anthu, nalendewa-lendewa.

⁵Kunena za nthaka, kucokera momwemo mumaturuka cakudya, Ndi m'munsi mwace musandulizika ngati ndi moto.

⁶Miyala yace ndiyo malo a safiro, Ndipo iri nalo pfumbi lagolidi.

⁷Njira imeneyi palibe ciombankhanga ciidziwa; Lingakhale diso la kabawi losapenyapo.

⁸Nyama zodzikuza sizinapondapo, Ngakhale mkango waukali sunapitapo.

⁹Munthu atambasulira dzanja lace kumwala; Agubuduza mapiri kuyambira kumizu.

¹⁰Asema njira pakati pa matanthwe, Ndi diso lace liona ciri conse ca mtengo wace.

¹¹Atseka mitsinje ingadonthe; Naturutsira poyera cobisikaci.

¹²Koma nzeru, idzapezeka kuti? Ndi luntha, malo ace ali kuti?

¹³Munthu sadziwa mtengo wace; Ndipo silipezeka m'dziko la amoyo.

¹⁴Pozama pakuti, Mwa ine mulibe; Ndi nyanja ikuti, Kwa ine kulibe.

¹⁵Silipezeka ndi golidi, Sayesapo siliva mtengo wace.

¹⁶Sailinganiza ndi golidi wa Ofiri, Ndi sohamu wa mtengo wace wapatali kapena safiro.

¹⁷Golidi ndi krustalo sizilingana nayo; Ndi kusinthana kwace, siisinthanika ndi zisambiro za golidi woyengetsa.

¹⁸Korali kapena ngale sizikumbukikapo. Mtengo wace wa nzeru uposa wa korali wofiira.

¹⁹Topazi wa Kusi sufanana nayo, Sailinganiza ndi golidi wolongosoka.

²⁰Koma nzeru ifuma kuti? Ndi luntha, pokhala pace pali kuti?

²¹Popeza pabisikira maso a zamoyo zonse, Pabisikiranso mbalame za m'mlengalenga,

²²Cionongeko ndi Imfa zikuti, Tamva mbiri yace m'makutu mwathu.

²³Mulungu ndiye: azindikira njira yace, Ndiye adziwa pokhala pace.

²⁴Pakuti apenyerera malekezero a dziko lapansi, Naona pansi pa thambo ponse;

²⁵Pamene anaikira mphepo muyeso wace, Nayesera madzi miyeso;

²⁶Pakucitira mvula lamulo, Ndi njira yoyendamo mphezi ya bingu;

²⁷Pamenepo anaiona nzeru, naifotokozera; Anaikonza, naisanthula.

²⁸Koma kwa munthu anati, Taonani, kuopa Ambuye ndiko nzeru; Ndi kupatukana naco coipa ndiko luntha.