Read Buku Lopatulik Yobu 29 Bible Online

Yobu 29 - Buku Lopatulik bible

Yobu 29

¹Ndipo Yobu anaonjezanso mwambi wace, nati,

²Ha! ndikadakhala monga m'miyezi yapitayi, Monga m'masiku akundisunga Mulungu;

³Muja nyali yace inawala pamutu panga, Ndipo ndi kuunika kwace ndinayenda mumdima;

⁴Monga umo ndinakhala m'masiku anga olimba, Muja uphungu wa Mulungu unakhala pahema panga;

⁵Muja Wamphamvuyonse akali nane pamodzi, Ndi ana anga anandizinga;

⁶Muja popondera ine padakhatamira ndi mafuta amkaka, Ndi thanthwe linanditsanulira mitsinje ya mafuta aazitona!

⁷Muja ndinaturuka kumka kucipata kumudzi, Muja ndinakonza pokhala panga kukhwalala,

⁸Anyamata anandiona nabisala, Okalamba anandinyamukira, nakhala ciriri,

⁹Akalonga anadziletsa kulankhula, Ndi kugwira pakamwa pao;

¹⁰Mau a omveka anali zi, Ndi lilime lao linamamatira ku malakalaka ao.

¹¹Pakuti pondimva ine khutu, linandidalitsa; Ndipo pondiona diso, linandicitira umboni.

¹²Pakuti ndinapulumutsa wozunzika wakupfuula; Mwana wamasiye yemwe wosowa mthandizi.

¹³Dalitso la iye akati atayike linandidzera, Ndi mtima wa mkazi wamasiye ndinauyimbitsa mokondwera.

¹⁴Ndinabvala cilungamo, ndipo cinandibvala ine; Ciweruzo canga cinanga mwinjiro ndi nduwira.

¹⁵Ndinali maso a akhungu, Ndi mapazi a otsimphina.

¹⁶Ndinali atate wa waumphawi; Ndi mlandu wa iye amene sindinamdziwa ndinafunsitsa.

¹⁷Ndipo ndinatyola nsagwada ya wosalungama, Ndi kukwatula cogwidwa kumano kwace.

¹⁸Pamenepo ndinati, Ndidzatsirizika m'cisa canga; Ndipo ndidzacurukitsa masiku anga ngati mcenga.

¹⁹Muzu wanga watambalala kufikira kumadzi; Ndi mame adzakhala pa nthambi yanga usiku wonse.

²⁰Ulemu wanga udzakhala wosaguga mwa ine, Ndi uta wanga udzakhala wosalifuka m'dzanja mwanga.

²¹Anthu anandimvera, nalindira, Nakhala cete, kuti ndiwapangire.

²²Nditanena mau anga sanalankhulanso, Ndi kunena kwanga kunawakhera.

²³Anandilindira ngati kulindira mvula, Nayasama pakamwa pao ngati kulira mvula ya masika.

²⁴Ndinawaseka akapanda kulimbika mtima; Ndipo sanagwetsa kusangalala kwa nkhope yanga.

²⁵Ndinawasankhira njira yao ndi kukhala mkuru wao. Ndinakhala ngati mfumu mwa ankhondo ace, Ngati wotonthoza ofedwa.