Read Buku Lopatulik Yobu 30 Bible Online

Yobu 30 - Buku Lopatulik bible

Yobu 30

¹Koma tsopano iwo osafikana msinkhu wanga andiseka, Iwo amene atate ao ndikadawapeputsa, osawaika pamodzi ndi agaru olinda nkhosa zanga.

²Mphamvunso ya m'manja mwao ndikadapindulanji nayo? Ndiwo anthu amene unyamata wao udatha,

³Atsala mafupa okha okha ndi kusowa ndi njala; Akungudza nthaka youma kuli mdima wa m'cipululu copasuka.

⁴Achera terere lokolera kuzitsamba, Ndi cakudya cao ndico mizu ya dinde.

⁵Anawapitikitsa pakati pa anthu, Awapfuulira ngati kutsata mbala.

⁶Azikhala m'zigwa za cizirezire, M'maenje a m'nthaka ndi m'mapanga.

⁷Pakati pa zitsamba alira ngati buru, Pansi pa khwisa asonkhana pamodzi.

⁸Ndiwo ana a opusa, inde ana a anthu opanda dzina; Anawaingitsa kuwacotsa m'dziko.

⁹Koma tsopano ndasanduka nyimbo ya oterewo, Nandiyesa nthanthi.

¹⁰Anyansidwa nane, akhala patali ndi ine, Saleka kuthira malobvu pankhope panga.

¹¹Pakuti anamasula nsinga zao, nandizunza; Anataya comangira m'kamwa mwao pamaso panga.

¹²Ku dzanja langa lamanja anauka oluluka, Akankha mapazi anga, Andiundira njira zao zakundiononga.

¹³Aipsa njira yanga, Athandizana ndi tsoka langa; Ndiwo anthu omwewo osowa mthandizi.

¹⁴Akudza ngati opitira pogamuka linga papakuru, Pakati pa zopasuka adzigubuduza kundidzera ine.

¹⁵Anditembenuzira zondiopsa, Auluza ulemu wanga ngati mphepo; Ndi zosungika zanga zapita ngati mtambo.

¹⁶Ndipo tsopano moyo wanga udzitsanulira m'kati mwanga; Masiku akuzunza andigwira.

¹⁷Nyengo ya usiku mafupa anga awaza mwa ine, Ndi zowawa zondikungudza sizipuma.

¹⁸Mwa mphamvu yaikuru ya nthenda yanga cobvala canga cinasandulika, Cindithina ngati pakhosi pa maraya anga.

¹⁹Iye anandiponya m'matope, Ndipo ndafanana ndi pfumbi ndi phulusa.

²⁰Ndipfuula kwa Inu, koma simundiyankha; Ndinyamuka, ndipo mungondipenyerera.

²¹Mwasandulika kundicitira nkharwe; Ndi mphamvu ya dzanja lanu mundizunza.

²²Mundikweza kumphepo, mundiyendetsa pomwepo; Ndipo mundisungunula mumkuntho.

²³Pakuti ndidziwa kuti mudzandifikitsa kuimfa, Ndi ku nyumba yokomanamo amoyo onse.

²⁴Koma munthu akati agwe, satambasula dzanja lace kodi? Akati aonongeke, sapfuulako kodi?

²⁵Kodi sindinamlirira misozi wakulawa zowawa? Kodi moyo wanga sunacitira cisoni osowa?

²⁶Muja ndinayembekeza cokoma cinadza coipa, Ndipo polindira kuunika unadza mdima.

²⁷M'kati mwanga mupweteka mosapuma, Masiku a mazunzo andidzera.

²⁸Ndiyenda ndiri wothimbirira osati ndi dzuwa ai; Ndinyamuka mumsonkhano ndi kupfuula,

²⁹Ndiri mbale wao wa ankhandwe, Ndi mnansi wao wa nthiwatiwa.

³⁰Khungu langa lada, nilindipfundukira; Ndi mafupa anga awawa ndi kutentha kwao.

³¹Cifukwa cace zeze wanga wasandulika wa maliro, Ndi citoliro canga ca mau a olira misozi.