Read Buku Lopatulik Yobu 32 Bible Online

Yobu 32 - Buku Lopatulik bible

Yobu 32

¹Pamenepo amuna atatuwa analeka kumyankha Yobu; pakuti anali wolungama pamaso pace pa iye mwini.

²Ndipo adapsa mtima Elihu mwana wa Barakeli wa ku Buzi, wa cibale ca Ramu, adapsa mtima pa Yobu; pakuti anadziyesera yekha wolungama, wosati Mulungu.

³Adapsa mtima pa mabwenzi ace atatu omwe, pakuti anasowa pomyankha; koma anamtsutsa Yobu kuti ali woipa.

⁴Ndipo Elihu analindira kulankhula ndi Yobu, popeza akulu misinkhu ndi iwowa.

⁵Koma pakuona Elihu kuti anthu atatuwa anasowa poyankha pakamwa pao anapsa mtima.

⁶Ndipo Elihu mwana wa Barakeli wa ku Buzi anayankha, nati, Ine ndine mnyamata, inu ndinu okalamba; Cifukwa cace ndinadziletsa, ndi kuopa kukuonetsani monga umo ndayesera ine.

⁷Ndinati, Amisinkhu anene, Ndi a zaka zocuruka alangize nzeru.

⁸Koma m'munthu muli mzimu, Ndi mpweya wa Wamphamvuyonse wawazindikiritsa.

⁹Akulu sindiwo eni nzeru, Ndi okalamba sindiwo ozindikira ciweruzo.

¹⁰Cifukwa cace ndinati, Ndimvereni ine, Inenso ndidzaonetsa monga umo ndayesera ine.

¹¹Taonani, ndinalindira mau anu, Ndinacherera khutu zifukwa zanu, Pofunafuna inu ponena.

¹²Inde ndinasamalira inu; Koma taonani, panalibe womtsutsa Yobu, Kapena wakumbwezera mau pakati painu.

¹³Msamati, Tapeza nzeru ndife, Mulungu akhoza kumkhulula, si munthu ai;

¹⁴Popeza sanandiponyera ine mau, Sindidzamyankha ndi maneno anu.

¹⁵Asumwa, sayankhanso, Anawathera mau.

¹⁶Kodi ndidzangolindira popeza sanena iwo, Popeza akhala du osayankhanso?

¹⁷Ndidzayankha inenso mau anga, Ndidzaonetsa inenso za m'mtima mwanga.

¹⁸Pakuti ndadzazidwa ndi mau, Ndi mzimu wa m'kati mwanga undifulumiza.

¹⁹Taonani, m'cifuwa mwanga muli ngati vinyo wosowa popungulira, Ngati matumba atsopano akuti aphulike.

²⁰Ndidzanena kuti cifundo citsike; Ndidzatsegula milomo yanga ndi kuyankha.

²¹Ndisati ndisamalire nkhope ya munthu, Kapena kumchula munthu maina omdyola nao;

²²Pakuti sindidziwa kuchula maina osyasyalika; Ndikatero Mlengi wanga adzandicotsa msanga.