Read Buku Lopatulik Yobu 33 Bible Online

Yobu 33 - Buku Lopatulik bible

Yobu 33

¹Komatu, Yobu, mumvere maneno anga, Mucherere khutu mau anga.

²Taonani tsono, ndatsegula pakamwa panga, Lilime langa lanena m'kamwa mwanga.

³Maneno anga aulula ciongoko ca mtima wanga, Ndi monga umo idziwira milomo yanga idzanena zoona.

⁴Mzimu wa Mulungu unandilenga, Ndi mpweya wa Wamphamvuyonse umandipatsa moyo.

⁵Ngati mukhoza, mundiyankhe; Mulongosolere mau anu pamaso panga, mukonzeke.

⁶Taonani, ndikhala kwa Mulungu ngati inu; Inenso ndinaumbidwa ndi dothi,

⁷Taonani, kuopsa kwanga simudzacita nako mantha; Ndi ici ndikusenzetsani sicidzakulemererani.

⁸Zedi mwanena m'makutu mwanga, Ndinamvanso mau akunena kwanu, akuti,

⁹Ndine woyera ine, wopanda kulakwa, Ndine wosaparamula, ndiribe mphulupulu.

¹⁰Taonani, Iye apeza zifukwa zoti anditsutse nazo, Andiyesa mdani wace;

¹¹Amanga mapazi anga m'zigologolo, Ayang'anira poyenda ine ponse.

¹²Taonani, ndidzakuyankhani m'mene muli mosalungama; Pakuti Mulungu ndiye wamkulu woposa munthu.

¹³Mutsutsana ndi Iye cifukwa ninji? Popeza pa zace zonse saulula cifukwa.

¹⁴Pakuti Mulungu alankhula kamodzi, Kapena kawiri, koma anthu sasamalira.

¹⁵M'kulota, m'masomphenya a usiku, Pakuwagwera anthu tulo tatikuru, Pogona mwacheru pakama,

¹⁶Pamenepo atsegula makutu a anthu, Nakomera cizindikilo cilangizo cao;

¹⁷Kuti acotse munthu ku cimene akadacita, Ndi kubisira munthu kudzikuza kwace;

¹⁸Kuti amletse angaonongeke, Ndi moyo wace ungatayike ndi lupanga.

¹⁹Alangidwanso ndi zowawa pakama pace, Ndi kulimbana kowawa kosapuma m'mafupa ace.

²⁰M'mwemo mtima wace ucita mseru ndi mkate, Ndi moyo wace pa cakudya colongosoka.

²¹Mnofu wace udatha, kuti sungapenyeke; Ndi mafupa ace akusaoneka aturuka.

²²Inde wasendera kufupi ku manda, Ndi moyo wace kwa akuononga.

²³Akakhala kwa iye mthenga, Womasulira mau mmodzi mwa cikwi, Kuonetsera munthu comuyenera;

²⁴Pamenepo Mulungu amcitira cifundo, nati, Mlanditse, angatsikire kumanda, Ndampezera dipo.

²⁵Mnofu wace udzakhala se, woposa wa mwana; Adzabwerera ku masiku a ubwana wace.

²⁶Apembedza Mulungu, ndipo amkomera mtima; M'mwemo aona nkhope yace mokondwera; Ndipo ambwezera munthu cilungamo cace.

²⁷Apenyerera anthu, ndi kuti, Ndinacimwa, ndaipsa coongokaco, Ndipo sindinapindula nako.

²⁸Koma anandiombola ndingatsikire kumanda, Ndi moyo wanga udzaona kuunika.

²⁹Taona, izi zonse azicita Mulungu Kawiri katatu ndi munthu,

³⁰Kumbweza angalowe kumanda, Kuti kuunika kwa moyo kumuwalire.

³¹Cherani khutu, Yobu, mundimvere ine; Mukhale cete, ndipo ndidzanena ine.

³²Ngati muli nao mau mundiyankhe. Nenani, pakuti ndifuna kukulungamitsani.

³³Ngati mulibe mau, tamverani Ine; Mukhale cete, ndipo ndizakuphunzitsani nzeru.