Read Buku Lopatulik Yobu 39 Bible Online

Yobu 39 - Buku Lopatulik bible

Yobu 39

¹Kodi udziwa nyengo yakuswana zinkhoma? Kodi wapenyerera pakuswa nswala?

²Ukhoza kodi kuwerenga miyezi yakuzipitira, Kapena udziwa nyengo yoti ziswane?

³Zithuntha, ziswa, Zitaya zowawa zao.

⁴Ana ao akhala ojinca, akulira kuthengo, Acoka osabwerera kwa amao.

⁵Ndani walola mbidzi ituruke yaufulu? Anaimasulira mbidzi nsinga zace ndani,

⁶Imene ndaciyesa cipululu nyumba yace, Ndi dziko lakhulo pokhala pace?

⁷Aseka phokoso la kumudzi, Osamva kukuwa kwa wofulumiza nyama za m'goli.

⁸Poyenda ponse pamapiri mpa busa pace; Ilondola caciwisi ciri conse.

⁹Kodi njati idzabvomera kukutumikira, Idzakhala ku codyetseramo cako kodi?

¹⁰Kodi ukhoza kumanga njati ndi lamba lace ilime m'mcera? Kapena idzakutsata kodi kufafaniza nthumbira m'zigwa?

¹¹Udzaikhulupirira kodi, popeza mphamvu yace njaikuru? Udzaisiyira nchito yako kodi?

¹²Kodi udzaitama kuti itute mbeu zako, Ndi kuzisonkhanitsira kudwale?

¹³Phiko la nthiwatiwa likondwera, Koma mapiko ndi nthenga zace nzofatsa kodi?

¹⁴Pakuti isiya mazira ace panthaka, Nimafunditsa m'pfumbi,

¹⁵Niiwala kuti phazi lingawaphwanye, Kapena cirombo cingawapondereze.

¹⁶Iumira mtima ana ace monga ngati sali ace; Idzilemetsa ndi nchito cabe, popeza iribe mantha;

¹⁷Pakuti Mulungu anaimana nzeru, Ndipo sanaigawira luntha.

¹⁸Ikafika nthawi yace, iweramuka, Iseka kavalo ndi wa pamsana pace.

¹⁹Wampatsa kavalo mphamvu yace kodi? Wambveka pakhosi pace cenjerere cogwedezeka?

²⁰Wamlumphitsa kodi ngati dzombe? Ulemerero wa kumina kwace ngwoopsa.

²¹Apalasa kucigwa, nakondwera nayo mphamvu yace; Aturuka kukomana nao eni zida.

²²Aseka mantha osaopsedwa, Osabwerera kuthawa lupanga.

²³Phodo likuti koco koco panthiti pace, Mkondo wonyezimira ndi nthungo yomwe.

²⁴Ndi kunjenjemera kwaukali aimeza nthaka, Osaimitsika pomveka lipenga.

²⁵Pomveka lipenga akuti, Hee! Anunkhiza nkhondo irikudza kutali Kugunda kwa akazembe ndi kuhahaza,

²⁶Kodi kabawi auluka mwa nzeru zako, Natambasula mapiko ace kumka kumwera?

²⁷Kodi ciombankhanga cikwera m'mwamba pocilamulira iwe, Nicimanga cisanja cace m'mwamba?

²⁸Kwao nku thanthwe, cigona komweko, Pansonga pa thanthwe pokhazikikapo.

²⁹Pokhala kumeneko ciyang'ana cakudya; Maso ace acipenyetsetsa ciri kutali,

³⁰Ana ace akumwa mwazi, Ndipo pomwe pali ophedwa, apo pali ico.