Read Buku Lopatulik Yobu 4 Bible Online

Yobu 4 - Buku Lopatulik bible

Yobu 4

¹Pamenepo Elifazi wa ku Temani anayankha, nati,

²Munthu akayesa kunena nawe mau, kodi udzamva nao cisoni? Koma akhoza ndani kudziletsa kunena?

³Taona iwe walangiza aunyinji, Walimbitsa manja a ofoka.

⁴Mau ako anacirikiza iye amene akadagwa, Walimbitsanso maondo otewa.

⁵Koma tsopano cakufikira iwe, ndipo ukomoka; Cikukhudza, ndipo ubvutika.

⁶Kodi kulimbika mtima kwako si ndiko kuti uopa Mulungu, Ndi ciyembekezo cako si ndiwo ungwiro wa njira zako?

⁷Takumbukila tsopano, watayika ndani wosaparamula konse? Kapena oongoka mtima alikhidwa kuti?

⁸Monga umo ndaonera, olimira mphulupulu, Nabzala bvuto, akololapo zomwezo.

⁹Atayika ndi mpweya wa Mulungu, Nathedwa ndi mpumo wa mkwiyo wace.

¹⁰Kubangula kwa mkango, ndi kulira kwa mkango waukali kwaletsedwa, Ndi mano a misona ya mkango atyoledwa.

¹¹Mkango wokalamba udzifera posowa mkoka, Ndi misona ya mkango waukazi imwazika.

¹²Anditengera mau m'tseri, M'khutu mwanga ndinalandira kunong'oneza kwace.

¹³M'malingaliro a masomphenya a usiku, Powagwira anthu tulo tatikuru,

¹⁴Anandidzera mantha ndi kunjenjemera, Nanthunthumira nako mafupa anga onse.

¹⁵Pamenepo panapita mzimu pamaso panga; Tsitsi la thupi langa lidati nyau nyau.

¹⁶Unaima ciriri, koma sindinatha kuzindikira maonekedwe ace; Panali mzukwa pamaso panga; Kunali cete, ndipo ndidamva mau akuti,

¹⁷Kodi munthu adzakhala wolungama ndi kuposa Mulungu? Kodi munthu adzakhala woyera woposa Mlengi wace?

¹⁸Taona, sakhulupirira atumiki ace; Nawanenera amithenga ace zopusa;

¹⁹Kopambana kotani nanga iwo akukhala m'nyumba zadothi, Amene kuzika kwao kuti m'pfumbi, Angothudzulidwa ngati gulugufe,

²⁰Kuyambira m'mawa kufikira madzulo athudzuka; Aonongeka kosatha, osasamalirako munthu.

²¹Kukometsetsa kwao sikumacotsedwa nao? Amafa koma opanda nzeru.