Read Buku Lopatulik Yobu 40 Bible Online

Yobu 40 - Buku Lopatulik bible

Yobu 40

¹Ndipo Yehova anabwereza kwa Yobu, nati,

²Kodi wodzudzulayo atsutsane ndi Wamphamvuyonse? Wocita makani ndi Mulungu ayankhe.

³Pamenepo Yobu anayankha Yehova, nati,

⁴Taonani, ndakhululuka ine, ndidzakubwezerani mau otani? Ndigwira pakamwa.

⁵Ndalankhula kamodzi, koma sindidzayankha; Inde kawiri, koma sindionjezanso.

⁶Ndipo Yehova anamyankha Yobu m'kabvumvulu, nati,

⁷Dzimangire m'cuuno tsono ngati mwamuna; Ndidzakufunsa, undidziwitse.

⁸Cingakhale ciweruzo canga udzacityola kodi? Udzanditsutsa kuti ndiri woipa kodi, kuti ukhale wolungama ndiwe?

⁹Kodi uli nalo dzanja ngati Ine Mulungu? Kapena ukhoza kugunda ndi mau ngati Ine?

¹⁰Udzikometsere tsono ndi ukulu ndi kukuzika, Nubvale ulemu ndi ulemerero.

¹¹Tsanulira mkwiyo wako wosefuka, Nupenyerere ali yense wodzikuza ndi kumcepetsa,

¹²Upenyerere ali yense wodzikuza, numtsitse, Nupondereze oipa pomwe akhala.

¹³Uwakwirire pamodzi m'pfumbi, Uzimange nkhope zao pobisika.

¹⁴Pamenepo inenso ndidzakubvomereza, Kuti dzanja lako lako lamanja likupulumutsa.

¹⁵Tapenya tsono mvuu ndinaipanga pamodzi ndi iwe, Ikudya udzu ngati ng'ombe.

¹⁶Tapenya tsono, mphamvu yace iri m'cuuno mwace, Ndi kulimbalimba kwace kuli m'mitsempha ya m'mimba yace.

¹⁷Igwedeza mcira wace ngati mkungudza; Mitsempha ya ncafu zace ipotana.

¹⁸Mafupa ace akunga misiwe yamkuwa; Ziwalo zace zikunga zitsulo zamphumphu,

¹⁹Iyo ndiyo ciyambi ca macitidwe a Mulungu; Wakuilenga anaininkha lupanga lace.

²⁰Pakuti mapiri aiphukitsira cakudya, Kumene zisewera nyama zonse za kuthengo,

²¹Igona pansi patsinde pa mitengo yamthunzi, Pobisala pabango ndi pathawale.

²²Mitengo yamthunzi iiphimba ndi mthunzi wao, Misondodzi ya kumtsinje iizinga.

²³Taona madzi a mumtsinje akakula, siinjenjemera; Ilimbika mtima, ngakhale Yordano atupa mpaka pakamwa pace,

²⁴Ikakhala maso, munthu adzaigwira kodi? Kapena kuboola m'mphuno mwace iri m'khwekhwe?