Read Buku Lopatulik Yobu 41 Bible Online

Yobu 41 - Buku Lopatulik bible

Yobu 41

¹Kodi ukhoza kukoka ng'ona ndi mbedza? Kapena kukanikiza kalandira wace ndi cingwe?

²Kodi ukhoza kumanga m'mphuno ndi mlulu? Kapena kuboola nsagwada wace ndi momba?

³Kodi idzacurukitsa mau akukupembedza? Kapena idzanena nawe mau ofatsa?

⁴Kodi idzapangana ndi iwe, Kuti uitenge ikhale kapolo wako wacikhalire?

⁵Kodi udzasewera nayo ngati mbalame? Kapena udzaimangira anamwali ako kuti aiwete?

⁶Kodi opangana malonda adzaitsatsa? Adzaigawana eni malonda?

⁷Kodi udzadzaza khungu lace ndi nchetho, Kapena mutu wace ndi miomba?

⁸Isanjike dzanja lako; Ukakumbukila nkhondoyi, sudzateronso.

⁹Taona, ciyembekezo cako ca pa iyo cipita pacabe. Kodi sadzatenga nkhawa munthu pakungoiona?

¹⁰Palibe wolimba mtima kuti adzaiputa. Ndipo ndaniyo adzaima pamaso pa Ine?

¹¹Ndaniyo anayamba kundipatsa Ine kuti ndimthokoze? Ziri zonse pansi pa thambo ponse ndi zanga.

¹²Sindikhala cete osachula ziwalo za ng'onayo, Ndi mbiri ya mphamvu yace, ndi makonzedwe ace okoma.

¹³Ndani adzasenda cobvala cace cakunja? Adzalowa ndani ku mizere iwiri ya mano ace?

¹⁴Adzatsegula ndani zitseko za pakamwa pace? Mano ace aopsa pozungulira pao.

¹⁵Maamba ace olimba ndiwo kudzitama kwace; Amangika pamodzi ngati okomeredwatu.

¹⁶Alumikizana lina ndi linzace, Mphepo yosalowa pakati pao.

¹⁷Amamatirana lina ndi linzace, Agwirana osagawanikana.

¹⁸Pakuyetsemula ing'anipitsa kuunika, Ndi maso ace akunga zikope za m'mawa.

¹⁹M'kamwa mwace muturuka miuni, Mbaliwali za moto zibukamo.

²⁰M'mphuno mwace muturuka utsi, Ngati nkhali yobwadamuka ndi moto wa zinyatsi.

²¹Mpweya wace uyatsa makara, Ndi m'kamwa mwace muturuka lawi la moto.

²²Kukhosi kwace kukhala mphamvu, Ndi mantha abvumbuluka patsogolo pace,

²³Nyama yace yopsapsala igwirana Ikwima pathupi pace yosagwedezeka.

²⁴Mtima wace ulimba ngati mwala, Inde ulimba ngati mwala wa mphero,

²⁵Ikanyamuka, amphamvu acita mantha; Cifukwa ca kuopsedwa azimidwa nzeru.

²⁶Munthu akaiyamba ndi lupanga, ligoma; Ngakhale nthungo, kapena mubvi, kapena mkondo.

²⁷Citsulo iciyesa phesi, Ndi mkuwa ngati mtengo woola.

²⁸Mubvi suithawitsa, Miyala ya pacoponyera iisandutsa ciputu,

²⁹Zibonga ziyesedwa ciputu, Iseka kuthikuza kwace kwa nthungo,

³⁰Kumimba kwace ikunga mapale akuthwa, Itasalala kuthope ngati copunthira.

³¹Icititsa nthubwinthubwi pozama ngati nkhali, Isanduliza nyanja ikunge mafuta.

³²Icititsa mifunde yonyezimira pambuyo pace; Munthu akadati pozama pali ndi imvi.

³³Pa dziko lapansi palibe cina colingana nayo, Colengedwa copanda mantha.

³⁴Ipenya ciri conse codzikuza, Ndiyo mfumu ya zodzitama zonse.