Read Buku Lopatulik Yobu 42 Bible Online

Yobu 42 - Buku Lopatulik bible

Yobu 42

¹Pamenepo Yobu anayankha Mulungu, nati,

²Ndidziwa kuti mukhoza kucita zonse, Ndi kuti palibe coletsa colingirira canu ciri conse,

³Ndani uyu abisa uphungu wosadziwa kanthu? Cifukwa cace ndinafotokozera zimene sindinazizindikira, Zondidabwiza, zosazidziwa ine,

⁴Tamveranitu, ndidzanena ine, Ndidzakufunsani, mundidziwitse.

⁵Kumva ndidamva mbiri yanu, Koma tsopano ndikupenyani maso;

⁶Cifukwa cace ndekha ndidzinyansa, ndi kulapa M'pfumbi ndi mapulusa.

⁷Kunali tsono atanena Yehova mau awa kwa Yobu, Yehova anati kwa Elifazi wa ku Temani, Mkwiyo wanga wakuyakira iwe ndi mabwenzi ako awiri, pakuti simunandinenera coyenera monga ananena mtumiki wanga Yobu.

⁸Ndipo tsono, mudzitengere ng'ombe zisanu ndi ziwiri, ndi nkhosa zamphongo zisanu ndi ziwiri, mumuke kwa mtumiki wanga Yobu, mudzifukizire nokha nsembe yopsereza; ndi mtumiki wanga Yobu adzapempherera inu, pakuti ndidzambvomereza iyeyu, kuti ndisacite nanu monga mwa kupusa kwanu; popeza simunandinenera coyenera monga ananena mtumiki Yobu.

⁹Namuka Elifazi wa ku Temani, ndi Bilidadi Msuki, ndi Zofara wa ku Naama, nacita monga Yehova adawauza; ndipo Yehova anabvomereza Yobu.

¹⁰Ndipo Yehova anacotsa ukapolo wa Yobu, pamene anapempherera mabwenzi ace; Yehova nacurukitsa zace zonse za Yobu mpaka kuziwirikiza.

¹¹Pamenepo anamdzera abale ace onse, ndi alongo ace onse, ndi onse odziwana naye kale, nadya naye mkate m'nyumba yace, nampukusira mitu, namtonthoza pa zoipa zonse Yehova anamfikitsirazi; nampatsanso yense ndarama ndi mphete yagolidi.

¹²Ndipo Yehova anadalitsa citsiriziro ca Yobu koposa ciyambi cace, ndipo anali nazo nkhosa zikwi khumi ndi zinai, ndi ngamila zikwi zisanu ndi cimodzi, ndi ng'ombe zamagoli cikwi cimodzi, ndi aburu akazi cikwi cimodzi.

¹³Anali naonso ana amuna asanu ndi awiri ndi ana akazi atatu.

¹⁴Ndipo anamucha dzina la woyamba Yemima, ndi dzina la waciwiri Keziya, ndi dzina la wacitatu Kerenihapuki.

¹⁵Ndipo m'dziko monse simunapezeka akazi okongola ngati ana akazi a Yobu, nawapatsa colowa atate wao pamodzi ndi alongo ao.

¹⁶Ndipo zitatha izi, Yobu anakhala ndi moyo zaka zana limodzi mphambu makumi anai, naona ana ace ndi zidzukulu zace mibadwo inai.

¹⁷Namwalira Yobu, wokalamba ndi wa masiku ocuruka.