Read Buku Lopatulik Yobu 6 Bible Online

Yobu 6 - Buku Lopatulik bible

Yobu 6

¹Koma Yobu anayankha, nati,

²Mwenzi atayesa bwino cisoni canga, Ndi kuika matsoka anga pamodzi pamuyeso!

³Pakuti zikadalemera tsopano koposa mcenga wa kunyanja; Cifukwa cace mau anga ndasonthokera kunena.

⁴Pakuti mibvi ya Wamphamvuyonse yandilowa, Mzimu wanga uumwa ulembe wace; Zoopsa za Mulungu zindindandira nkhondo.

⁵Kodi mbidzi ilira pokhala nao msipu? Ilira kodi ng'ombe pa cakudya cace?

⁶Kodi cinthu cosakolera cidyeka copanda mcere? Coyera ca dzira cikolera kodi?

⁷Zimene moyo wanga ukana kuzikhudza Zikunga cakudya cosakolera kwa ine.

⁸Ha! ndikadakhala naco cimene ndicipempha, Mulungu akadandipatsa cimene ndicilira!

⁹Cimkomere Mulungu kundiphwanya, Alole dzanja lace lindilikhel

¹⁰Pamenepo ndidzasangalala, Ndidzakondwera naco cowawa cosandileka; Pakuti sindinawabisa mau a Woyerayo.

¹¹Mphamvu yanga njotani kuti ndiyembekeze? Mathedwe anga ndi otani kuti ndipirire?

¹²Kodi mphamvu yanga ndiyo mphamvu ya miyala? Mnofu wanga ndi mkuwa kodi?

¹³Mulibe thandizo mwa ine ndekha; cipulumutso candithawa.

¹⁴Iye amene akadakomoka, bwenzi lace ayenera kumcitira cifundo; Angaleke kuopa Wamphamvuyonse.

¹⁵Abale anga anacita monyenga ngati kamtsinje, Ngati madzi a timitsinje akupitirira.

¹⁶Amada cifukwa ca madzi oundana. M'menemo cipale cofewa cibisika;

¹⁷Atafikira mafundi, mitsinje iuma; Kukatentha, imwerera m'malo mwao.

¹⁸Aulendo akutsata njira yao apambukapo, Akwerera poti se, natayika.

¹⁹Aulendo a ku Tema anapenyerera, Makamu a ku Seba anaiyembekezera.

²⁰Anazimidwa popeza adaikhulupirira; Anafikako, nathedwa nzeru.

²¹Pakuti tsopano mukhala mamwemo; Muona coopsa, mucitapo mantha.

²²Ngati ndinati, Mundipatse? Kapena, Muperekeko kwa ine cuma canu?

²³Kapena, Mundilanditse m'dzanja la mdani? Kapena, Mundiombole m'dzanja la oopsa?

²⁴Mundilangize, ndipo ndidzakhala cete ine; Mundizindikiritse umo ndinalakwira.

²⁵Mau oongoka si ndiwo amphamvu? Koma kudzudzula kwanu mudzudzula ciani?

²⁶Kodi muyesa kudzudzula mau? Popeza maneno a munthu wodololoka akunga mphepo.

²⁷Indetu, mugwetsera wamasiye msampha, Mumkumbira bwenzi lanu mbuna.

²⁸Koma tsopano balindani, mundipenyerere; Ndikanena bodza pamaso panu mudzalizindikira.

²⁹Bwererani, ndikupemphani, musandiipsire mlandu; Inde, bwereraninso, mlandu wanga ngwolungama.

³⁰Kodi pali cosalungama palilime panga? Ngati sindizindikira zopanda pace m'kamwa mwanga?