Read Buku Lopatulik Yobu 7 Bible Online

Yobu 7 - Buku Lopatulik bible

Yobu 7

¹Kodi munthu alibe nkhondo kunja kuno? Kodi masiku ace sakunga masiku a wolembedwa nchito?

²Monga kapolo woliralira mthunzi, Monga wolembedwa nchito ayembekezera mphotho yace,

³Momwemo anandilowetsa miyezi yopanda pace. Nandiikiratu zowawa usiku ndi usiku.

⁴Ndigona pansi, ndikuti, Ndidzauka liti? koma usiku undikulira; Ndipo ndimapalapata mpaka mbanda kuca.

⁵Mnofu wanga wabvala mphutsi ndi nkanambo zadothi; Khungu langa lang'ambika, nilinyansa.

⁶Masiku anga afulumira koposa mphindo ya muomba, Apitirira opanda ciyembekezo.

⁷Kumbukila kuti moyo wanga ndiwo mphepo, Diso langa silidzaonanso cokoma.

⁸Diso la amene andiona silidzandionanso, Maso ako adzandipenyetsetsa, koma ine palibe.

⁹Mtambo wapita watha, Momwemo wakutsikira kumanda sadzakwerakonso.

¹⁰Sadzabweranso ku nyumba yace, Osamdziwanso malo ace.

¹¹Potero sindidzaletsa pakamwa panga; Ndidzalankhula popsinjika mumzimu mwanga; Ndidzadandaula pakuwawa mtima wanga.

¹²Ndine nyanja kodi, kapena cinjoka ca m'nyanja, Kuti Inu mundiikira odikira?

¹³Ndikati, Pakama panga mpondisangalatsa, Pogona panga padzacepsa condidandaulitsa;

¹⁴Pamenepo mundiopsa ndi maloto, Nimundicititsa mantha ndi masomphenya;

¹⁵Potero moyo wanga usankha kupotedwa, Ndi imfa, koposa mafupa anga awa.

¹⁶Ndinyansidwa nao moyo wanga; sindidzakhala ndi moyo cikhalire; Mundileke; pakuti masiku anga ndi acabe.

¹⁷Munthu ndani kuti mumkuze, Ndi kuti muike mtima wanu pa iye,

¹⁸Ndi kuti muceze naye m'mawa ndi m'mawa, Ndi kumuyesa nthawi zonse?

¹⁹Mukana kundicokera kufikira liti, Kapena kundileka mpaka nditameza dobvu?

²⁰Ngati ndacimwa, ndingacitire Inu ciani, Inu wodikira anthu? Mwandiikiranji ndikhale candamali canu? Kuti ndikhale kwa ine ndekha katundu?

²¹Mulekeranji kukhululukira kulakwa kwanga ndi kundicotsera mphulupulu yanga? Popeza tsopano ndidzagona kupfumbi; Mudzandifunafuna, koma ine palibe.