Read Buku Lopatulik Yobu 8 Bible Online

Yobu 8 - Buku Lopatulik bible

Yobu 8

¹Pamenepo anayankha Bilidadi Msuki, nati,

²Udzanena izi kufikira liti? Ndipo mau a pakamwa pako adzakhala ngati namondwe kufikira liti?

³Ngati Mulungu akhotetsa ciweruzo? Ngati Wamphamvuyonse akhotetsa mlandu?

⁴Cinkana ana ako anamcimwira Iye, Ndipo anawapereka mwa kulakwa kwao;

⁵Koma ukafunitsitsa Mulungu, Ndi kupembedza Wamphamvuyonse;

⁶Ukakhala woyera ndi woongoka mtima, Zoonadi adzakugalamukira tsopano, Ndi kupindulitsa pokhala pako polungama.

⁷Ndipo cinkana ciyambi cako cinali cacing'ono, Citsiriziro cako cidzacuruka kwambiri.

⁸Pakuti ufunsire tsono mbadwo wapitawo, Nusamalire zimene makolo ao adazisanthula;

⁹Pakuti ife ndife adzulo, osadziwa kanthu, Popeza masiku athu a pa dziko lapansi ndiwo ngati mthunzi;

¹⁰Amene aja sangakuphunzitse, ndi kukufotokozera, Ndi kuturutsa mau a mumtima mwao?

¹¹Ngati gumbwa aphuka popanda cinyontho? Ngati mancedza amera popanda madzi?

¹²Akali auwisi, sanawaceka, Auma, asanaume mathengo onse ena.

¹³Momwemo mayendedwe a onse oiwala Mulungu; Ndi ciyembekezo ca onyoza Mulungu cidzatayika;

¹⁴Kulimbika mtima kwace kudzatyoka, Cikhulupiriro cace cikunga nyumba ya tandaude.

¹⁵Adzatsamira nyumba yace, koma yosamlimbira; Adzaiumirira koma yosakhalitsa.

¹⁶Akhala wamuwisi pali dzuwa, Ndi nthambi zace ziturukira pamunda pace.

¹⁷Mizu yace iyangayanga pa kasupe wamadzi, Apenyerera pokhalapo miyala.

¹⁸Akamuononga kumcotsa pamalo pace, Padzamkana, ndi kuti, Sindinakuona.

¹⁹Taona, ici ndico comkondweretsa panjira pace, Ndi panthaka padzamera ena.

²⁰Taona, Mulungu sakana munthu wangwiro; Kapena kugwiriziza ocita zoipa.

²¹Koma adzadzaza m'kamwa mwako ndi kuseka, Ndi milomo yako kupfuula.

²²Iwo akudana nawe adzabvala manyazi; Ndi hema wa oipa adzakhala kuli zi.