Read Buku Lopatulik Yobu 9 Bible Online

Yobu 9 - Buku Lopatulik bible

Yobu 9

¹Pamenepo Yobu anayankha, nati,

²Zoona, ndidziwa kuti ciri cotero. Koma munthu adzakhala walungama bwanji kwa Mulungu?

³Akafuna Iye kutsutsana naye, Sadzambwezera Iye mau amodzi onse mwa cikwi.

⁴Ndiye wa mtima wanzeru, ndi wa mphamvu yaikuru; Ndaniyo anadziumitsa mtima pa Iye, nakhala nao mtendere?

⁵Ndiye amene asuntha mapiri, osacidziwa iwo, Amene amagubuduza mu mkwiyo wace.

⁶Amene agwedeza dziko lapansi licoke m'malo mwace, Ndi mizati yace injenjemere.

⁷Amene alamulira dzuwa ndipo silituruka, Nakomera nyenyezi cizindikilo cakuzitsekera.

⁸Woyala thambo yekha, Naponda pa mafunde a panyanja.

⁹Wolenga Mlalang'amba, Akamwiniatsatana, ndi Nsangwe, Ndi Kumpotosimpita,

¹⁰Wocita zazikuru zosasanthulika, Ndi zodabwiza zosawerengeka,

¹¹Taona, Mulungu apita pali ine, koma sindimpenya; Napitirira, koma osamaindikira ine.

¹²Taona, akwatula, adzambwezetsa ndani? Adzanena naye ndani, Mulikucita ciani?

¹³Mulungu sadzabweza mkwiyo wace; Athandizi odzikuza awerama pansi pa Iye.

¹⁴Nanga ine tsono ndidzamyankha bwanji, Ndi kusankha mau anga akutsutsana ndi Iye?

¹⁵Ameneyo, cinkana ndikadakhala wolungama, sindikadamyankha; Ndikadangompembedza wondiweruza ine.

¹⁶Ndikadaitana, ndipo akadayankha Iye, Koma sindikadakhulupirira kuti Iye wamvera mau anga,

¹⁷Pakuti andityola ndi mkuntho, Nacurukitsa mabala anga kopanda cifukwa.

¹⁸Sandilola kuti ndipume, Koma andidzaza ndi zowawa.

¹⁹Tikanena za mphamvu, si ndiye wamphamvu? Tikanena za kuweruza, adzamuitana ndani?

²⁰Cinkana ndikhala wolungama, pakamwa panga padzanditsutsa; Cinkana ndikhala wangwiro, padzanditsutsa wamphulupulu.

²¹Cinkana ndikhala wangwiro, sindidzisamalira mwini, Ndipeputsa moyo wanga.

²²Kuli cimodzimodzi monsemo, m'mwemo ndikuti Iye aononga wangwiro ndi woipa pamodzi.

²³Mkwapulo ukapha modzidzimutsa, Adzaseka tsoka la wosacimwa.

²⁴Dziko lapansi laperekedwa m'dzanja la woipa; Aphimba maso a oweruza ace. Ngati sindiye, pali yaninso?

²⁵Tsopano masiku anga afulumira kuposa wamtokoma; Athawa osaona cokoma.

²⁶Apitirira ngati zombo zaliwiro; Ngati mphungu igudukira cakudya cace.

²⁷Ndikati, Ndidzaiwala condidandaulitsa, Ndidzasintha nkhope yanga yacisoni, ndidzasekerera;

²⁸Pamenepo ndiopa zisoni zanga zonse, Ndidziwa kuti simudzandiyesa wosacimwa.

²⁹Mlandu udzanditsutsa; Potero ndigwire nchito cabe cifukwa ninji?

³⁰Ndikasamba madzi a cipale cofewa Ndi kuyeretsa manja anga ndi sopo;

³¹Mudzandibviikanso muli zoola, Ndi zobvala zanga zidzanyansidwa nane.

³²Pakuti sindiye munthu, monga ine, kuti ndimyankhe, Kuti tikomane mlandu.

³³Palibe wakutiweruza, Wakutisanjika ife tonse awiri manja ace.

³⁴Andicotsere ndodo yace, Coopsa cace cisandicititse mantha;

³⁵Kuti ndinene, osamuopa, Pakuti sinditero monga umo ndiri.