Read Buku Lopatulik Masalmo 10 Bible Online

Masalmo 10 - Buku Lopatulik bible

Masalmo 10

¹Muimiranji patari, Yehova? Mubisaliranji m'nyengo za nsautso?

²Podzikuza woipa apsereza waumphawi; Agwe m'ciwembu anapanganaco.

³Pakuti woipa adzitamira cifuniro ca moyo wace, Adalitsa wosirira, koma anyoza Yehova.

⁴Woipa, monga mwa kudzikuza kwa nkhope yace, akuti, Sadzafunsira. Malingaliro ace onse akuti, Palibe Mulungu.

⁵Mayendedwe ace alimbika nthawi zonse; Maweruzo anu ali pamwamba posaona iye; Adani ace onse awanyodola.

⁶Ati mumtima mwace, Sindidzagwedezeka ine; Ku mibadwo mibadwo osagwa m'tsoka ine.

⁷M'kamwa mwace mwadzala kutemberera ndi manyengo ndi kucenjerera; Pansi pa lilime lace pali cibvutitso copanda pace.

⁸Akhala m'molalira midzi; Mobisalamo akupha munthu wosacimwa: Ambisira waumphawi nkhope yace,

⁹Alalira monga mkango m'ngaka mwace; Alalira kugwira wozunzika: Agwira wozunzika, pakumkola m'ukonde mwace.

¹⁰Aunthama, nawerama, Ndipo aumphawi agwa m'zala zace.

¹¹Anena m'mtima mwace, Mulungu waiwala; Wabisa nkhope yace; sapenya nthawi zonse,

¹²Ukani, Yehova; samulani dzanja lanu, Mulungu; Musaiwale ozunzika.

¹³Woipa anyozeranii Mulungu, Anena m'mtima mwace, Simudzafunsira?

¹⁴Mwapenya; pakuti mumayang'anira cibvutitso ndi cisoni kuti acipereke m'manja mwanu; Waumphawi adzipereka kwa Inu; Wamasiye mumakhala mthandizi wace.

¹⁵Thyolani mkono wa woipa; Ndipo wocimwa, mutsate coipa cace kufikira simucipezanso cina.

¹⁶Yehova ndiye Mfumu ku nthawi yamuyaya; Aonongeka amitundu m'dziko lace.

¹⁷Yehova, mwamva cikhumbo ca ozunzika: Mudzakhazikitsa mtima wao, mudzachereza khutu lanu:

¹⁸Kuti muweruze mlandu wa amasiye ndi wokhalira mphanthi, Kuti munthu wa pa dziko lapansi angaonjeze kuopsa.