Read Buku Lopatulik Masalmo 102 Bible Online

Masalmo 102 - Buku Lopatulik bible

Masalmo 102

¹Yehova, imvani pemphero langa, Ndipo mpfuu wanga ufikire Inu.

²Musandibisire nkhope yanu tsiku la nsautso yanga; Mundichereze khutu lanu; Tsiku limene ndiitana ine mundiyankhe msanga,

³Popeza masiku anga akanganuka ngati utsi, Ndi mafupa anga anyeka ngati nkhuni.

⁴Mtima wanga ukunga udzu wamweta, nufota; Popeza ndiiwala kudya mkate wanga.

⁵Cifukwa ca liu la kubuula kwanga Mnofu wanga umamatika ku mafupa anga.

⁶Ndikunga bvuwo m'cipululu; Ndikhala ngati kadzidzi wa kumabwinja.

⁷Ndidikira, ndikhala ngati mbawa Iri yokha pamwamba pa tsindwi.

⁸Adani anga anditonza tsiku lonse; Akundiyarukirawo alumbirira ine.

⁹Pakuti ndadya mapulusa ngati mkate, Ndi kusanganiza-comwera canga ndi misozi,

¹⁰Cifukwa ca ukali wanu ndi kuzaza kwanu; Popeza munandinyamula ndipo munandigwetsa.

¹¹Masiku anga akunga mthunzi womka m'tali; Ndipo ine ndauma ngati udzu.

¹²Koma Inu, Yehova, mukhalabe ku nthawi yonse; Ndi cikumbukilo canu ku mibadwo mibadwo.

¹³Inu mudzauka, ndi kucitira nsoni Ziyoni; Popeza yafika nyengo yakumcitira cifundo, nyengo yoikika.

¹⁴Pakuti atumiki anu akondwera nayo miyala yace, Nacitira cifundo pfumbi lace.

¹⁵Pamenepo amitundu adzaopa dzina la Yehova, Ndi mafumu onse a dziko lapansi ulemerero wanu;

¹⁶Pakuti Yehova anamanga Ziyoni, Anaoneka m'ulemerero wace;

¹⁷Anasamalira pemphero la iwo akusowa konse, Osapepula pemphero lao.

¹⁸Ici adzacilembera mbadwo ukudza; Ndi mtundu wa anthu umene udalengedwa udzamlemekeza Yehova.

¹⁹Pakuti anapenya pansi ali kumwamba kuli malo ace opatulika; Yehova pokhala kumwamba anapenya dziko lapansi;

²⁰Kuti amve kubuula kwa wandende; Namasule ana a imfa,

²¹Kuti anthu alalikire dzina la Yehova m'Ziyoni, Ndi cilemekezo cace m'Yerusalemu;

²²Posonkhana pamodzi mitundu ya anthu, Ndi maufumu kuti atumikire Yehova.

²³Iye analanda mphamvu yanga panjira; Anacepsa masiku anga.

²⁴Ndinati, Mulungu wanga, musandicotse pakati pa masiku anga: Zaka zanu zikhalira m'mibadwo mibadwo.

²⁵Munakhazika dziko lapansi kalelo; Ndipo zakumwamba ndizo nchito ya manja anu.

²⁶Zidzatha izi, koma Inu mukhala: Inde, zidzatha zonse ngati cabvala; Mudzazisintha ngati maraya, ndipo zidzasinthika:

²⁷Koma Inu ndinu yemweyo, Ndi zaka zanu sizifikira kutha.

²⁸Ana a atumiki anu adzakhalitsa, Ndi mbeu zao zidzakhazikika pamaso panu.