Read Buku Lopatulik Masalmo 104 Bible Online

Masalmo 104 - Buku Lopatulik bible

Masalmo 104

¹Lemekeza Yehova, moyo wanga; Yehova, Mulungu wanga, Inu ndinu wamkurukuru;

²Mubvala ulemu ndi cifumu. Amene mudzikuta nako kuunika monga ndi cobvala; Ndi kuyala thambo ngati nsaru yocinga;

³Amene alumikiza mitanda ya zipinda zace m'madzi; Naika makongwa akhale agareta ace; Nayenda pa mapiko a mphepo;

⁴Amene ayesa mphepo amithenga ace; Lawi la moto atumiki ace;

⁵Anakhazika dziko lapansi pa maziko ace, Silidzagwedezeka ku nthawi yonse.

⁶Mudalikuta ndi nyanja ngati ndi cobvala; Madzi anafikira pamwamba pa mapiri,

⁷Pa kudzudzula kwanu anathawa; Anathawa msanga liu la bingu lanu;

⁸Anakwera m'mapiri, anatsikira m'zigwa, Kufikira malo mudawakonzeratu.

⁹Munaika malire kuti asapitirireko; Kuti asabwererenso kuphimba dziko lapansi.

¹⁰Atumiza akasupe alowe m'makwawa; Ayenda pakati pa mapiri:

¹¹Zimamwamo nyama zonse za kuthengo; Mbidzi zipherako ludzu lao.

¹²Mbalame za mlengalenga zifatsa pamenepo, Zimayimba pakati pa mitawi.

¹³Iye amwetsa mapiri mocokera m'zipinda zace: Dziko lakhuta zipatso za nchito zanu.

¹⁴Ameretsa msipu ziudye ng'ombe, Ndi zitsamba acite nazo munthu; Naturutse cakudya cocokera m'nthaka;

¹⁵Ndi vinyo wokondweretsa mtima wa munthu, Ndi mafuta akunyezimiritsa nkhope yace, Ndi mkate wakulimbitsa mtima wa munthu.

¹⁶Mitengo ya Mulungu yadzala ndi madzi; Mikungudza ya ku Lebano imene anaioka;

¹⁷M'mwemo mbalame zimanga zisa zao; Pokhala cumba mpa mitengo ya mikungudza,

¹⁸Mapiri atali ndiwo ayenera zinkhoma; Pamatanthwe mpothawirapo mbira.

¹⁹Anaika mwezi nyengo zace; Dzuwa lidziwa polowera pace.

²⁰Muika mdima ndipo pali usiku; Pamenepo zituruka zirombo zonse za m'thengo.

²¹Misona ya mkango ibangula potsata nyama yao, Nifuna cakudya cao kwa Mulungu.

²²Poturuka dzuwa, zithawa, Zigona pansi m'ngaka mwao.

²³Pamenepo munthu aturukira ku nchito yace, Nagwiritsa kufikira madzulo.

²⁴Nchito zanu zicurukadi, Yehova! Munazicita zonse mwanzeru; Dziko lapansi lidzala naco cuma canu.

²⁵Nyanja siyo, yaikuru ndi yacitando, M'mwemo muli zokwawa zosawerengeka; Zamoyo zazing'ono ndi zazikuru.

²⁶M'mwemo muyenda zombo; Ndi livyatanu amene munamlenga aseweremo.

²⁷Izi zonse zikulindirirani, Muzipatse cakudya cao pa nyengo yace.

²⁸Cimene muzipatsa zigwira; Mufumbatula dzanja lanu, zikhuta zabwino.

²⁹Mukabisa nkhope yanu, ziopsedwa; Mukalanda mpweya wao, zikufa, Nizibwerera kupfumbi kwao.

³⁰Potumizira mzimu wanu, zilengedwa; Ndipo mukonzanso nkhope ya dziko lapansi.

³¹Ulemerero wa Yehova ukhale kosatha; Yehova akondwere mu nchito zace;

³²Amene apenyerera pa dziko lapansi, ndipo linjenjemera; Akhudza mapiri, ndipo afuka.

³³Ndidzayimbira Yehova m'moyo mwanga: Ndidzayimbira Mulungu wanga zomlemekeza pokhala ndiripo.

³⁴Pomlingirira Iye pandikonde; Ndidzakondwera mwa Yehova.

³⁵Ocimwa athedwe ku dziko lapansi, Ndi oipa asakhalenso. Yamika Yehova, moyo wanga. Haleluya.