Read Buku Lopatulik Masalmo 105 Bible Online

Masalmo 105 - Buku Lopatulik bible

Masalmo 105

¹Yamikani Yehova, itanirani pa dzina lace; Bukitsani mwa mitundu ya anthu zocita Iye.

²Myimbireni, myimbireni zomlemekeza; Fotokozerani zodabwiza zace zonse.

³Mudzitamandire ndi dzina lace loyera: Mitima yao ya iwo ofunsira Yehova ikondwere.

⁴Funani Yehova, ndi mphamvu yace; Funsirani nkhope yace nthawi zonse.

⁵Kumbukilani zodabwiza zace adazicita; Zizindikilo zace ndi maweruzo a pakamwa pace;

⁶Inu mbeu za Abrahamu, mtumiki wace, Inu ana a Yakobo, osankhika ace.

⁷Iye ndiye Yehova, Mulungu wathu; Maweruzo ace akhala pa dziko lonse lapansi.

⁸Akumbukila cipangano cace kosatha, Mauwo anawalamulira mibadwo zikwi;

⁹Cipanganoco anapangana ndi Abrahamu, Ndi lumbiro lace ndi Isake;

¹⁰Ndipo anaciimikira Yakobo, cikhale malemba, Cikhale cipangano cosatha kwa Israyeli.

¹¹Ndi kunena kuti, Ndidzakupatsa iwe dziko la Kanani, Gawo la colandira cako;

¹²Pokhala iwo anthu owerengeka, Inde, anthu pang'ono, ndi alendo m'mwemo;

¹³Nayendayenda kucokera mtundu wina kufikira mtundu wina, Kucokera ufumu wina kufikira anthu ena.

¹⁴Sanalola munthu awasautse; Ndipo anadzudzula mafumu cifukwa ca iwowa;

¹⁵Ndi kuti musamakhudza odzozedwa anga, Musamacitira coipa aneneri anga.

¹⁶Ndipo anaitana njala igwere dziko; Anatyola mcirikizo wonse wa mkate.

¹⁷Anawatsogozeratu munthu; Anamgulitsa Yosefe akhale kapolo:

¹⁸Anapweteka miyendo yace ndi matangadza; Anamgoneka m'unyolo;

¹⁹Kufikira nyengo yakucitika maneno ace; Mau a Yehova anamuyesa.

²⁰Mfumuyo anatuma munthu nammasula; Woweruza mitundu ya anthu anamtsegulira.

²¹Anamuika akhale woyang'anira nyumba yace, Ndi woweruza wa pa zace zonse:

²²Amange nduna zace iye mwini, Alangize akulu ace adziwe nzeru.

²³Pamenepo Israyeli analowa m'Aigupto; Ndi Yakobo anakhala mlendo m'dziko la Hamu.

²⁴Ndipo anacurukitsatu mtundu wa anthu ace, Nawapatsa mphamvu yoposa owasautsa.

²⁵Anasanduliza mitima yao, kuti adane nao anthu ace, Kuti acite monyenga ndi atumiki ace.

²⁶Anatuma Mose mtumiki wace, Ndi Aroni amene adamsankha.

²⁷Anaika pakati pao zizindikilo zace, Ndi zodabwiza m'dziko la Hamu.

²⁸Anatumiza mdima ndipo kunada; Ndipo sanapikisana nao mau ace.

²⁹Anasanduliza madzi ao akhale mwazi, Naphanso nsomba zao.

³⁰Dziko lao linacuruka acule, M'zipinda zomwe za mafumu ao.

³¹Ananena, ndipo inadza mitambo ya nchenche, Ndi nsabwe kufikira m'malire ao onse.

³²Anawapatsa mvula yamatalala, Lawi la moto m'dziko lao.

³³Ndipo anapanda mipesa yao, ndi mikuyu yao; Natyola mitengo kufikira m'malire ao onse.

³⁴Ananena, ndipo linadza dzombe Ndi mphuci, ndizo zosawerengeka,

³⁵Ndipo zinadya zitsamba zonse za m'dziko mwao, Zinadyanso zipatso za m'nthaka mwao.

³⁶Ndipo Iye anapha acisamba onse m'dziko mwao Coyambira ca mphamvu yao yonse.

³⁷Ndipo anawaturutsa pamodzi ndi siliva ndi golidi: Ndi mwa mafuko ao munalibe mmodzi wokhumudwa.

³⁸Aigupto anakondwera pakucoka iwo; Popeza kuopsa kwao kudawagwera.

³⁹Anayala mtambo uwaphimbe; Ndi moto uunikire usiku,

⁴⁰Anafunsa ndipo Iye anadzetsa zinziri. Nawakhuritsa mkate wakumwamba.

⁴¹Anatsegula pathanthwe, anaturukamo madzi; Nayenda pouma ngati mtsinje.

⁴²Popeza anakumbukila mau ace oyera, Ndi Abrahamu mtumiki wace.

⁴³Potero anaturutsa anthu ace ndi kusekerera, Osankhika ace ndi kupfuula mokondwera.

⁴⁴Ndipo anawapatsa maiko a amitundu; Iwo ndipo analanda zipatso za nchito ya anthu:

⁴⁵Kuti asamalire malemba ace, Nasunge malamulo ace. Haleluya.