Read Buku Lopatulik Masalmo 106 Bible Online

Masalmo 106 - Buku Lopatulik bible

Masalmo 106

¹Haleluya. Yamikani Yehova; pakuti Iye ndiye wabwino: Pakuti cifundo cace ncosatha.

²Adzafotokoza ndani nchito zamphamvu za Yehova, Adzamveketsa ndani cilemekezo cace conse?

³Odala iwo amene asunga ciweruzo, Iye amene acita cilungamo nthawi zonse.

⁴Mundikumbukile, Yehova, monga momwe mubvomerezana ndi anthu anu; Mundionetsa cipulumutso canu:

⁵Kuti ndione cokomaco ca osankhika anu, Kuti ndikondwere naco cikondwerero ca anthu anu, Kuti ndidzitamandire pamodzi ndi colowa canu.

⁶Talakwa pamodzi ndi makolo athu; Tacita mphulupulu, tacita coipa.

⁷Makolo athu sanadziwitsa zodabwiza zanu m'Aigupto; Sanakumbukila zacifundo zanu zaunyinji; Koma anapikisana ndi Inu kunyanja, ku Nyanja Yofiira.

⁸Koma anawapulumutsa cifukwa ca dzina lace, Kuti adziwitse cimphamvu cace.

⁹Ndipo anadzudzula Nyanja Yofiira, niiphwa: Potero anawayendetsa mozama ngati m'cipululu.

¹⁰Ndipo anawapulumutsa m'dzanja la iye amene anawada, Nawaombola ku dzanja la mdani.

¹¹Ndipo madziwo anamiza owasautsa; Sanatsala mmodzi yense.

¹²Pamenepo anabvomereza mau ace; Anayimbira comlemekeza.

¹³Koma anaiwala nchito zace msanga; Sanalindira uphungu wace:

¹⁴Popeza analaka-lakatu kucidikhako, Nayesa Mulungu m'cipululu.

¹⁵Ndipo anawapatsa copempha iwo; Koma anaondetsa mitima yao.

¹⁶Ndipo kumisasa anacita nao nsanje Mose Ndi Aroni woyerayo wa Yehova.

¹⁷Dziko lidayasama nilidameza Datani, Ndipo linafotsera gulu la Abiramu.

¹⁸Ndipo m'gulu mwao mudayaka moto; Lawi lace lidapsereza oipawo.

¹⁹Anapanga mwana wa ng'ombe ku Horebu, Nagwadira fano loyenga.

²⁰M'mwemo anasintha ulemerero wao Ndi fanizo la ng'ombe Yakudya msipu.

²¹Anaiwala Mulungu mpulumutsi wao, Amene anacita zazikulu m'Aigupto;

²²Zodabwiza m'dziko la Hamu, Zoopsa ku Nyanja Yofiira.

²³Potero Iye adati awaononge, Pakadapanda Mose wosankhika wace, kuima pamaso pace pagamukapo, Kubweza ukali wace ungawaononge,

²⁴Anapeputsanso dziko lofunika, Osabvomereza mau ace;

²⁵Koma anadandaula m'mahema mwao, Osamvera mau a Yehova.

²⁶Potero anawasamulira dzanja lace, Kuti awagwetse m'cipululu:

²⁷Kugwetsanso mbeu zao mwa amitundu, Ndi kuwabalalitsa m'maiko maiko.

²⁸Ndipo anadzipatikiza ndi BaalaPeori, Nadyanso nsembe za akufa.

²⁹Ndipo anamkwiyitsa nazo zocita zao; Kotero kuti mliri unawagwera.

³⁰Pamenepo panauka Pinehasi, nacita cilango: Ndi mliriwo unaletseka.

³¹Ndipo adamuyesa iye wacilungamo, Ku mibadwo mibadwo ku nthawi zonse.

³²Anautsanso mkwiyo wace ku madzi a Meriba, Ndipo kudaipira Mose cifukwa ca iwowa:

³³Pakuti anawawitsa mzimu wace, Ndipo analankhula zosayenera ndi milomo yace.

³⁴Sanaononga mitunduyo ya anthu, Imene Mulungu adawauza;

³⁵Koma anasokonekerana nao amitundu, Naphunzira nchito zao:

³⁶Ndipo anatumikira mafano ao, Amene anawakhalira msampha:

³⁷Ndipo anapereka ana ao amuna ndi akazi nsembe ya kwa ziwanda,

³⁸Nakhetsa mwazi wosacimwa, ndi wo mwazi wa ana ao amuna ndi akazi, Amene anawaperekera nsembe mafano a Kanani; M'mwemo analidetsa dziko ndi mwaziwo.

³⁹Ndipo anadziipsa nazo nchito zao, Nacita cigololo nao macitidwe ao.

⁴⁰Potero udayaka mkwiyo wa Yehova pa anthu ace, Nanyansidwa Iye ndi colowa cace.

⁴¹Ndipo anawapereka m'manja a amitundu; Ndipo odana nao anacita ufumu pa iwo.

⁴²Adani ao anawasautsanso, Nawagonjetsa agwire mwendo wao.

⁴³Iye anawalanditsa kawiri kawiri; Koma anapikisana ndi Iye mwa uphungu wao, Ndi mphulupulu zao zinawafoketsa,

⁴⁴Koma anapenya nsautso yao, Pakumva kupfuula kwao:

⁴⁵Ndipo anawakumbukila cipangano cace, Naleza monga mwa kucuruka kwa cifundo cace.

⁴⁶Ndipo anawacitira kuti apeze nsoni Pamaso pa onse amene adawamanga ndende.

⁴⁷Tipulumutseni, Yehova, Mulungu wathu, Ndi kutisokolotsa kwa amitundu, Kuti tiyamike dzina lanu loyera, Ndi kudzitamandira naco cilemekezo canu.

⁴⁸Wodala Yehova, Mulungu wa Israyeli, Kuyambira kosayamba kufikira kosatha. Ndi anthu onse anene, Amen. Haleluya,