Read Buku Lopatulik Masalmo 107 Bible Online

Masalmo 107 - Buku Lopatulik bible

Masalmo 107

¹Yamikani Yehova pakuti Iye ndiye wabwino; Pakuti cifundo cace ncosatha.

²Atere oomboledwa a Yehova, Amene anawaombola m'dzanja la wosautsa;

³Nawasokolotsa kumaiko, Kucokera kum'mawa ndi kumadzulo, Kumpoto ndi kunyanja.

⁴Anasokera m'cipululu, m'njira yopanda anthu; Osapeza mudzi wokhalamo.

⁵Anamva njala ndi ludzu, Moyo wao unakomoka m'kati mwao.

⁶Pamenepo anapfuulira kwa Yehova mumsauko mwao, Ndipo anawalanditsa m'kupsinjika kwao.

⁷Ndipo anawatsogolera pa njira yolunjika, Kuti amuke ku mudzi wokhalamo.

⁸Ayamike Yehova cifukwa ca cifundo cace, Ndi zodabwiza zace za kwa ana a anthu!

⁹Pakuti akhutitsa mtima wolakalaka, Nadzaza mtima wanjala ndi zabwino.

¹⁰Iwo akukhala mumdima ndi mu mthunzi wa imfa, Omangika ndi kuzunzika ndi citsulo;

¹¹Popeza anapikisana nao mau a Mulungu, Napeputsa uphungu wa Wam'mwambamwamba;

¹²Kotero kuti anagonjetsa mtima wao ndi cobvuta; Iwowa anakhumudwa koma panalibe mthandizi.

¹³Pamenepo anapfuulira kwa Yehova mumsauko mwao, Ndipo anawapulumutsa m'kupsinjika kwao.

¹⁴Anawaturutsa mumdima ndi mu mthunzi wa imfa, Nadula zomangira zao.

¹⁵Ayamike Yehova cifukwa ca cifundo cace, Ndi zodabwiza zace za kwa ana a anthu!

¹⁶Popeza adaswa zitseko zamkuwa, Natyola mipiringidzo yacitsulo.

¹⁷Anthu opusa azunzika cifukwa ca zolakwa zao, Ndi cifukwa ca mphulupulu zao.

¹⁸Mtima wao unyansidwa naco cakudya ciri conse; Ndipo ayandikira zipata za imfa.

¹⁹Pamenepo apfuulira kwa Yehova m'kusauka kwao, Ndipo awapulumutsa m'kupsinjika kwao.

²⁰Atumiza mau ace nawaciritsa, Nawapulumutsa ku cionongeko cao.

²¹Ayamike Yehova cifukwa ca cifundo cace, Ndi zodabwiza zace za kwa ana a anthu!

²²Ndipo apereke nsembe zaciyamiko, Nafotokozere nchito zace ndi kupfuula mokondwera.

²³Iwo akutsikira kunyanja nalowa m'zombo, Akucita nchito zao pa madzi akuru;

²⁴Iwowa apenya nchito za Yehova, Ndi zodabwiza zace m'madzi ozama.

²⁵Popeza anena, nautsa namondwe, Amene autsa mafunde ace.

²⁶Akwera kuthambo, atsikira kozama; Mtima wao usungunuka naco coipaco.

²⁷Adzandira napambanitsa miyendo ngati munthu woledzeta, Nathedwa nzeru konse.

²⁸Pamenepo apfuulira kwa Yehova m'kusauka kwao, Ndipo awaturutsa m'kupsinjika kwao.

²⁹Asanduliza namondwe akhale bata, Kotero kuti mafunde ace atonthole.

³⁰Pamenepo akondwera, popeza pagwabata; Ndipo Iye awatsogolera kudooko afumko.

³¹Ayamike Yehova cifukwa ca cifundo cace, Ndi zodabwiza zace za kwa ana a anthu!

³²Amkwezenso mu msonkhano wa anthu, Namlemekeze pokhala akulu.

³³Asanduliza mitsinje ikhale cipululu, Ndi akasupe a madzi akhale nthaka youma;

³⁴Dziko lazipatso, likhale lakhulo, Cifukwa ca coipa ca iwo okhalamo.

³⁵Asanduliza cipululu cikhale tha wale, Ndi dziko louma likhale akasupe a madzi.

³⁶Ndi apo akhalitsa anjala, Kuti amangeko mudzi wokhalamo anthu;

³⁷Nafese m'minda, naoke mipesa, Ndiyo vakubata zipatso zolemeza.

³⁸Ndipo awadalitsa, kotero kuti, acuruka kwambiri; Osacepsanso zoweta zao.

³⁹Koma acepanso, nawerama, Cifukwa ca cisautso, coipa ndi cisoni.

⁴⁰Atsanulira cimpepulo pa akulu, Nawasokeretsa m'cipululu mopanda njira.

⁴¹Koma aika waumphawi pamsanje posazunzika, Nampatsa mabanja ngati gulu la nkhosa.

⁴²Oongoka mtima adzaciona nadzasekera; Koma cosalungama conse citseka pakamwa pace.

⁴³Wokhala nazo nzeru asamalire izi, Ndipo azindikire zacifundo za Yehova,