Read Buku Lopatulik Masalmo 137 Bible Online

Masalmo 137 - Buku Lopatulik bible

Masalmo 137

¹Ku mitsinje ya ku Babulo, Kumeneko tinakhala pansi, inde tinalira, Pokumbukila Ziyoni.

²Pa msondodzi uli m'mwemo Tinapacika mazeze athu.

³Popeza pamenepo akutigwirawo anatifunsa nyimbo, Ndipo akutizunza anafuna tisekere, Ndi kuti, Mutiyimbire nyimbo imodzi ya ku Ziyoni.

⁴Tidati, Tidzayimba bwanji nyimbo ya Yehova M'dziko lacilendo?

⁵Ndikakuiwalani, Yerusalemu, Dzanja lamanja langa liiwale luso lace.

⁶Lilime langa limamatike ku nsaya zanga, Ndikapanda kukumbukila inu; Ndikapanda kusankha Yerusalemu Koposa cimwemwe canga copambana.

⁷Yehova, kumbukilani ana a Edomu Tsiku la Yerusalemu; Amene adati, Gamulani, gamulani, Kufikira maziko ace.

⁸Mwana wamkazi wa ku Babulo, iwe amene udzapasulidwa; Wodala iye amene adzakubwezera cilango Monga umo unaticitira ife.

⁹Wodala iye amene adzagwira makanda ako, Ndi kuwaphwanya pathanthwe.