Read Buku Lopatulik Masalmo 144 Bible Online

Masalmo 144 - Buku Lopatulik bible

Masalmo 144

¹Wolemekezeka Yehova thanthwe langa, Wakuphunzitsa manja anga acite nkhondo, Zala zanga zigwirane nao:

²Ndiye cifundo canga, ndi linga langa, Msanje wanga, ndi mpulumutsi wanga; Cikopa canga, ndi Iye amene ndimtama; Amene andigonjetsera anthu anga.

³Yehova, munthu ndani kuti mumdziwa? Mwana wa munthu kuti mumsamalira?

⁴Munthu akunga mpweya; Masiku ace akunga mthunzi wopitirira.

⁵Weramutsani thambo lanu, Yehova, nimutsike: Khudzani mapiri ndipo adzafuka.

⁶Ng'animitsani mphezi, ndi kuwabalalitsa; Tumizani mibvi yanu, ndi kuwapitikitsa,

⁷Turutsani manja anu kucokera m'mwamba; Ndikwatuleni ndi kundilanditsa ku madzi akuru, Ku dzanja la alendo;

⁸Amene pakamwa pao alankhula zacabe, Ndi dzanja lao lamanja ndilo dzanja lacinyengo.

⁹Ndidzakuyimbirani nyimbo yatsopano, Mulungu; Pa cisakasa ca zingwe khumi ndidzayimbira zakukulemekezani.

¹⁰Ndiye amene apatsa mafumu cipulumutso: Amene alanditsa Davide mtumiki wace ku lupanga loipa.

¹¹Ndilanditseni ndi kundipulumutsa ku dzanja la alendo, Amene pakamwa pao alankhula zacabe, Ndi dzanja lao lamanja ndilo dzanja lacinyengo.

¹²Kuti ana athu amuna akhale ngati mmera udakula usanakhwime; Ana athu akazi ngati nsanamira za kungondya, zosema zikometsere nyumba ya mfumu.

¹³Kuti nkhokwe zathu zidzale, kutipatsa za mitundu mitundu; Ndi kuti nkhosa zathu ziswane zikwi zikwi, inde zikwi khumi kubusako.

¹⁴Kuti ng'ombe zathu zikhale zasenza katundu; Ndi kuti pasakhale kupasula linga kapena kuturukamo, Pasakhalenso kupfuula m'makwalala athu.

¹⁵Odala anthu akuona zotere; Odala anthu amene Mulungu wao ndi Yehova.