Read Buku Lopatulik Masalmo 145 Bible Online

Masalmo 145 - Buku Lopatulik bible

Masalmo 145

¹Ndidzakukwezani Mulungu wanga, Mfumu; Ndipo ndidzalemekeza dzina lanu ku nthawi za nthawi.

²Masiku onse ndidzakuyamikani; Ndi kulemekeza dzina lanu ku nthawi za nthawi.

³Yehova ndi wamkulu, nayenera kulemekezedwa kwakukuru; Ndi ukulu wace ngwosasanthulika.

⁴Mbadwo wina udzalemekezera nchito zanu mbadwo unzace, Ndipo udzalalikira zamphamvu zanu.

⁵Ndidzalingalira ulemerero waukuru wa ulemu wanu, Ndi nchito zanu zodabwiza.

⁶Ndipo adzanenera mphamvu za nchito zanu zoopsa; Ndi ukulu wanu ndidzaufotokozera.

⁷Adzabukitsa cikumbukilo ca ubwino wanu waukuru, Nadzayimbira cilungamo canu.

⁸Yehova ndiye wacisomo, ndi wacifundo; Osakwiya msanga, ndi wa cifundo cacikuru.

⁹Yehova acitira cokoma onse; Ndi nsoni zokoma zace zigwera nchito zace zonse.

¹⁰Nchito zanu zonse zidzakuyamikani, Yehova; Ndi okondedwa anu adzakulemekezani.

¹¹Adzanenera ulemerero wa ufumu wanu, Adzalankhulira mphamvu yanu;

¹²Kudziwitsa ana a anthu zamphamvu zace, Ndi ulemerero waukuru wa ufumu wace.

¹³Ufumu wanu ndiwo ufumu womka muyaya, Ndi kuweruza kwanu kufikira mibadwo yonse yonse.

¹⁴Yehova agwiriziza onse akugwa, Naongoletsa onse owerama.

¹⁵Maso a onse ayembekeza Inu; Ndipo muwapatsa cakudya cao m'nyengo zao.

¹⁶Muniowetsa dzanja lanu, Nimukwaniritsira zamoyo zonse cokhumba cao.

¹⁷Yehova ali wolungama m'njira zace zonse, Ndi wacifundo m'nchito zace zonse.

¹⁸Yehova ali pafupi ndi onse akuitanira kwa Iye, Onse akuitanira kwa Iye m'coonadi.

¹⁹Adzacita cokhumba iwo akumuopa; Nadzamva kupfuula kwao, nadzawapulumutsa.

²⁰Yehova asunga onse akukondana naye; Koma oipa onse adzawaononga.

²¹Pakamwa panga padzanena cilemekezo ca Yehova; Ndi zinthu zonse zilemekeze dzina lace loyera ku nthawi za nthawi.