Read Buku Lopatulik Masalmo 147 Bible Online

Masalmo 147 - Buku Lopatulik bible

Masalmo 147

¹Haleluya; Pakuti kuyimbira zomlemekeza Mulungu wathu nkokoma; Pakuti cikondwetsa ici, cilemekezo ciyenera.

²Yehova amanga Yerusalemu; Asokolotsa otayika a Israyeli.

³Aciritsa osweka mtima, Namanga mabala ao.

⁴Awerenga nyenyezi momwe ziri; Azicha maina zonsezi.

⁵Ambuye wathu ndi wamkuru ndi wa mphamvu zambiri; Nzeru yace njosatha.

⁶Yehova agwiriziza ofatsa; Atsitsira oipa pansi.

⁷Yamikani Yehova ndi kuthira mang'ombe; Myimbireni Mulungu wathu zamlemekeza pazeze:

⁸Amene aphimba thambo ndi mitambo, Amene akonzera mvula nthaka, Amene aphukitsa msipu pamapiri.

⁹Amene apatsa zoweta cakudya cao, Ana a khungubwi alikulira.

¹⁰Mphamvu ya kavalo siimkonda: Sakondwera nayo miyendo ya munthu.

¹¹Yehova akondwera nao akumuopa Iye, Iwo akuyembekeza cifundo cace.

¹²Yerusalemu, lemekezani Yehova; Ziyoni, lemekezani Mulungu wanu.

¹³Popeza analimbitsa mipiringidzo ya zitseko zanu: Anadalitsa ana anu m'kati mwanu.

¹⁴Ndiyeamene akhalitsamalireanu mumtendere; Akukhutitsani ndi tirigu wakuca bwino.

¹⁵Atumiza lamulo lace ku dziko lapansi; Mau ace athamanga liwiro.

¹⁶Apatsa cipale cofewa ngati ubweya; Awaza cisanu ngati phulusa.

¹⁷Aponya matalala ace ngati zidutsu: Adzaima ndani pa kuzizira kwace?

¹⁸Atumiza mau ace nazisungunula; Aombetsa mphepo yace, ayenda madzi ace.

¹⁹Aonetsa mau ace kwa Yakobo; Malemba ace, ndi maweruzo ace kwa Israyeli.

²⁰Sanatero nao anthu amtundu wina; Ndipo za maweruzo ace, sanawadziwa. Haleluya.