Read Buku Lopatulik Masalmo 148 Bible Online

Masalmo 148 - Buku Lopatulik bible

Masalmo 148

¹Haleluya. Lemekezani Yehova kocokera kumwamba; Mlemekezeni m'misanje.

²Mlemekezeni, angelo ace onse; Mlemekezeni, makamu ace onse.

³Mlemekezeni, dzuwa ndi mwezi; Mlemekezeni, nyenyezi zonse zaunikira.

⁴Mlemekezeni, m'mwambamwamba, Ndi madzi inu, a pamwamba pa thambo.

⁵Alemekeze dzina la Yehova; Popeza analamulira, ndipo zinalengedwa.

⁶Anazikhazikanso ku nthawi za nthawi; Anazipatsa cilamulo cosatumphika.

⁷Lemekezani Yehova kocokera ku dziko lapansi, Zinsomba inu, ndi malo ozama onse;

⁸Moto ndi matalala, cipale cofewa ndi nkhungu; Mphepo ya namondwe, yakucita mau ace;

⁹Mapiri ndi zitunda zonse; Mitengo yazipatso ndi yamikungudza yonse:

¹⁰Nyama za kuthengo ndi zoweta zonse; Zokwawa, ndi mbalame zakuuluka;

¹¹Mafumu a padziko ndi mitundu yonse ya anthu; Zinduna ndi oweruza onse a padziko;

¹²Anyamata ndiponso anamwali; Okalamba pamodzi ndi ana:

¹³Alemekeze dzina la Yehova; Pakuti dzina lace lokha ndi lokwezeka; Ulemerero wace uli pamwamba pa dziko lapansi ndi thambo.

¹⁴Ndipo anakweza nyanga ya anthu ace, Cilemekezo ca okondedwa ace onse; Ndiwo ana a Israyeli, anthu a pafupi pa Iye, Haleluya,