Read Buku Lopatulik Masalmo 16 Bible Online

Masalmo 16 - Buku Lopatulik bible

Masalmo 16

¹Ndisungeni ine, Mulungu: pakuti ndakhulupirira Inu.

²Ndinati kwa Yehova, Inu ndinu Ambuye wanga: Ndiribe cabwino cina coposa Inu.

³Za oyera mtima okhala pa dziko lapansi, Iwo ndiwo omveka mbiri, mwa iwowo muli cikondwero canga conse.

⁴Zidzacuruka zisoni zao za iwo otsata mulungu wina: Sindidzathira nsembe zao zamwazi, Ndipo sindidzachula maina ao pakamwa panga,

⁵Yehova ndiye gawo la colowa canga ndi cikho canga: Ndinu wondigwirira colandira canga,

⁶Zingwe zandigwera mondikondweretsa; Inde cosiyira cokoma ndiri naco.

⁷Ndidzadalitsa Yehova, amene anandicitira uphungu: Usikunso imso zanga zindilangiza.

⁸Ndaika Yehova patsogolo panga nthawi zonse: Popeza ali pa dzanja langa lamanja, sindidzagwedezeka.

⁹Cifukwa cace wasekera mtima wanga, nukondwera ulemu wanga; Mnofu wanganso udzakhala mokhazikika.

¹⁰Pakuti simudzasiya moyo wanga kumanda; Simudzalola wokondedwa wanu abvunde.

¹¹Mudzandidziwitsa njira ya moyo: Pankhope panu pali cimwemwe cokwanira; M'dzanja lanu lamanja muli zokondweretsa zomka muyaya.