Read Buku Lopatulik Masalmo 22 Bible Online

Masalmo 22 - Buku Lopatulik bible

Masalmo 22

¹Mulungu wanga, Mulungu wanga, mwandisiyiranji ine? Mukhaliranji kutali kwa cipulumutso canga, ndi kwa mau a kubuula kwanga?

²Mulungu wanga, ndiitana usana, koma simubvomereza; Ndipo usiku, sindikhala cete.

³Koma Inu ndinu woyera, Wakukhala m'malemekezo a Israyeli.

⁴Makolo athu anakhulupirira Inu: Anakhulupirira, ndipo munawalanditsa.

⁵Anapfuula kwa Inu, napulumutsidwa: Anakhulupita Inu, ndipo sanacita manyazi.

⁶Koma ine ndine nyongolotsi, si munthu ai: Cotonza ca anthu, ndi wonyozedwa ndi anthu.

⁷Onse akundipenya andiseka: Akwenzula, apukusa mutu, nati,

⁸Adadzitengera kwa Yehova; kuti adzampulumutsa, Amlanditse tsopano popeza akondwera naye.

⁹Pakuti Inu ndinu wondibadwitsa: Wondikhulupiritsa pokhala ine pa bere la mai wanga.

¹⁰Cibadwire ine anandisiyira Inu: Kuyambira kwa mai wanga Mulungu wanga ndinu.

¹¹Musandikhalire kutali; pakuti nsautso iri pafupi: Pakuti palibe mthandizi.

¹²Ng'ombe zamphongo zambiri zandizinga: Mphongo zolimba za ku Basana zandizungulira,

¹³Andiyasamira m'kamwa mwao, Ngati mkango wozomola ndi wobangula.

¹⁴Ndathiridwa pansi monga madzi, Ndipo mafupa anga onse anaguluka: Mtima wanga ukunga sera; Wasungunuka m'kati mwa matumbo anga,

¹⁵Mphamvu yanga yauma ngati phale; Ndi lilime langa likangamira ku nsaya zanga; Ndipo mwandifikitsa ku pfumbi la imfa.

¹⁶Pakuti andizinga agaru: Msonkhano wa oipa wanditsekereza; Andiboola m'manja anga ndi m'mapazi anga.

¹⁷Ndikhoza kuwerenga mafupa anga onse; Iwo ayang'ana nandipenyetsetsa ine:

¹⁸Agawana zobvala zanga, Nalota maere pa malaya anga,

¹⁹Koma Inu, Yehova, musakhale kutari; Mphamvu yanga Inu, mufulumire kundithandiza.

²⁰Landitsani moyo wanga kulupanga; Wokondedwa wanga ku mphamvu ya garu,

²¹Ndipulumutseni m'kamwa mwa mkango; Inde mwandiyankha ine ndiri pa nyanga za njati,

²²Ndidzalalikira dzina lanu kwa abale anga: Pakati pa msonkhano ndidzakulemekezani.

²³Inu akuopa Yehova, mumlemekeze; Inu nonse mbumba ya Yakobo, mumcitire ulemu; Ndipo mucite mantha ndi Iye, inu nonse mbumba ya Israyeli.

²⁴Pakuti sanapeputsa ndipo sananyansidwa ndi zunzo la wozunzika; Ndipo sanambisira nkhope yace; Koma pompfuulira Iye, anamva.

²⁵Lemekezo langa lidzakhala la Inu mu msonkhano waukuru: Zowinda zanga ndidzazicita pamaso pa iwo akumuopa Iye.

²⁶Ozunzika adzadya nadzakhuta: Adzayamika Yehova iwo amene amfuna: Ukhale moyo mtima wako nthawi zonse.

²⁷Malekezero onse a dziko lapansi adzakumbukila nadzatembenukira kwa Yehova: Ndipo mafuko onse a amitundu adzagwadira pamaso panu.

²⁸Pakuti ufumuwo ngwa Yehova; Iye acita ufumu mwa amitundu.

²⁹Onenepa onse a pa dziko lapansi adzadya nadzagwadira: Onse akutsikira kupfumbi adzawerama pamaso pace, Ndi iye amene sadziwa kusunga moyo wace.

³⁰Mbumba ya anthu idzamtumikira; Kudzanenedwa za Ambuye ku mibadwo yakudza.

³¹Iwo adzadza nadzafotokozera cilungamo cace Kwa anthu akadzabadwa, kuti Iye anacicita.