Read Buku Lopatulik Masalmo 33 Bible Online

Masalmo 33 - Buku Lopatulik bible

Masalmo 33

¹Pfuulani mokondwera mwa Yehova, inu olungama mtima: Oongoka mtima ayenera kulemekeza.

²Yamikani Yehova ndi zeze: Myimbireni ndi cisakasa ca zingwe khumi.

³Mumyimbire Iye Nyimbo yatsopano; Muyimbe mwaluso kumveketsa mau.

⁴Pakuti mau a Yehova ali olunjika; Ndi nchito zace zonse zikhulupirika.

⁵Iye ndiye wakukonda cilungamo ndi ciweruzo: Dziko lapansi ladzala ndi cifundo ca Yehova.

⁶Zakumwamba zinalengedwa ndi mau a Yehova; Ndipo ndi mpweya wa m'kamwa mwace khamu lao lonse.

⁷Amaunjika madzi a m'nyanja monga mulu: Amakundika zakudya mosungiramo.

⁸Dziko lonse lapansi liope Yehova: Ponse pali anthu acite mantha cifukwa ca Iye,

⁹Pakuti ananena, ndipo cinacitidwa; Analamulira, ndipo cinakhazikika.

¹⁰Yehova aphwanya upo wa amitundu: Asandutsa cabe zolingirira za mitundu ya anthu.

¹¹Ciweruzo ca Yehova cikhazikika cikhazikikire, Zolingirira za m'mtima mwace ku mibadwo mibadwo.

¹²Wodalitsika mtundu wa anthu umene Yehova ndiye Mulungu wao; Mtundu womwe anausankha ukhale colandira ca iye yekha.

¹³Yehova apenyerera m'mwamba; Aona ana onse a anthu.

¹⁴M'malo akhalamo Iye, amapenya pansi Pa onse akukhala m'dziko lapansi;

¹⁵Iye amene akonza mitima ya iwo onse, Amene azindikira zocita zao zonse.

¹⁶Palibe mfumu yoti gulu lalikuru limpulumutsa: Mphamvu yaikuru siicilanditsa ciphona,

¹⁷Kavalo safikana kupulumuka naye: Cinkana mphamvu yace njaikuru sapulumutsa.

¹⁸Taonani, diso la Yehova liri pa iwo akumuopa Iye, Pa iwo akuyembekeza cifundo cace;

¹⁹Kupulumutsa moyo wao kwa imfa, Ndi kuwasunga ndi moyo m'nyengo ya njala.

²⁰Moyo wathu walindira Yehova: Iye ndiye thandizo lathu ndi cikopa cathu.

²¹Pakuti mtima wathu udzakondwera mwa Iye, Cifukwa takhulupirira dzina lace loyera.

²²Yehova, cifundo canu cikhale pa ife, Monga takuyembekezani Inu.