Read Buku Lopatulik Masalmo 44 Bible Online

Masalmo 44 - Buku Lopatulik bible

Masalmo 44

¹Mulungu, tidamva m'makutu mwathu, makolo athu anatisimbira, Za nchitoyo mudaicita masiku ao, masiku akale.

²Inu munapitikitsa amitundu ndi dzanja lanu, koma iwowa munawaoka; Munasautsa mitundu ya anthu, ndipo munawaingitsa,

³Pakuti sanalanda dziko ndi lupanga lao, Ndipo mkono wao sunawapulumutsa: Koma dzanja lanu lamanja, ndi mkono wanu, ndi kuunika kwa nkhope yanu. Popeza munakondwera nao,

⁴Inu ndinu mfumu yanga, Mulungu: Lamulirani cipulumutso ca Yakobo.

⁵Mwa Inu tidzakankhira pansi otsutsana nafe: M'dzina lanu tidzapondereza akutiukira ife.

⁶Pakuti sinditama uta wanga, Ndipo lupanga langa silingandipulumutse.

⁷Koma Inu munatipulumutsa kwa iwo akutsutsana nafe, Ndipo akudana nafe, mudawacititsa manyazi.

⁸Mwa Mulungu tidzitamanda tsiku lonse, Ndipo dzina lanu tidzaliyamika kosatha.

⁹Koma mwatitaya, ndi kutinyazitsa; Ndipo simuturuka nao makamu a nkhondo athu.

¹⁰Mutibwereretsa kuthawa otisautsa: Ndipo akudana nafe adzifunkhira okha.

¹¹Mwatipereka ngati nkhosa zoyenera kuzidya; Ndipo mwatibalalitsa mwa amitundu.

¹²Mugulitsa anthu anu kwacabe, Ndipo mtengo wace simupindula nao.

¹³Mutisandutsa cotonza kwa anzathu, Ndi coseketsa ndi colalatitsa iwo akutizinga.

¹⁴Mutiika tikhale onyozeka mwa amitundu, Ndi kuti anthu atipukusire mitu.

¹⁵Tsiku lonse cimpepulo canga cikhala pamaso panga, Ndipo manyazi a pankhope panga andikuta.

¹⁶Cifukwa ca mau a wotonza wocitira mwano; Cifukwa ca mdani ndi wobwezera cilango,

¹⁷Zonsezi zatigwera; koma sitinakuiwalani, Ndipo sitinacita monyenga m'pangano lanu.

¹⁸Mtima wathu sunabwerera m'mbuyo, Ndipo m'mayendedwe athu sitinapatuka m'njira yanu;

¹⁹Mungakhale munatityola mokhala zirombo, Ndi kutiphimba nao mthunzi wa imfa.

²⁰Tikadaiwala dzina la Mulungu wathu, Ndi kutambasulira manja athu kwa mulungu wacilendo;

²¹Mulungu sakadasanthula ici kodi? Pakuti adziwa zinsinsi za mtima.

²²Koma, cifukwa ca Inu, tiphedwa tsiku lonse; Tiyesedwa ngati nkhosa zakuzipha.

²³Galamukani, mugoneranji, Ambuye? Ukani, musatitaye citayire.

²⁴Mubisiranji nkhope yanu, Ndi kuiwala kuzunzika ndi kupsinjika kwathu?

²⁵Pakuti moyo wathu waweramira kupfumbi: Pamimba pathu pakangamira dziko lapansi.

²⁶Ukani, tithandizeni, Tiomboleni mwa cifundo canu.