Read Buku Lopatulik Masalmo 45 Bible Online

Masalmo 45 - Buku Lopatulik bible

Masalmo 45

¹Mtima wanga usefukira naco cinthu cokoma: Ndinena zopeka ine za mfumu: Lilime langa ndilo peni yofulumiza kulemba.

²Inu ndinu wokongola ndithu kuposa ana a anthu; Anakutsanulirani cisomo pa milomo yanu: Cifukwa cace Mulungu anakudalitsani kosatha.

³Dzimangireni lupanga lanu m'cuuno mwanu, wamphamvu inu, Ndi ulemerero wanu ndi ukulu wanu.

⁴Ndipo pindulani, m'ukulu wanu yendani, Kaamba ka coonadi ndi cifatso ndi cilungamo: Ndipo dzanja lanu lidzakuphunzitsani zoopsa.

⁵Mibvi yanu njakuthwa; Mitundu ya anthu igwa pansi pa Inu: Iwalasa mumtima adani a mfumu.

⁶Mpando wacifumu wanu, Mulungu, ukhala nthawi zonse zamkamuyaya: Ndodo yacifumu ya ufumu wanu ndiyo ndodo yolunjika.

⁷Mukonda cilungamo, ndipo mudana naco coipa: Cifukwa cace Mulungu, ndiye Mulungu wanu, wadzoza inu Ndi mafuta a cikondwerero kuposa anzanu.

⁸Zobvala zanu zonse nza mure, ndi khonje, ndi kasya; M'zinyumba za mfumu zomanga ndi minyanga ya njobvu mwatoruka zoyimba za zingwe zokukondweretsani.

⁹Mwa omveka anu muli ana akazi amafumu: Ku dzanja lamanja lanu aima mkazi wa mfumu wobvala golidi wa ku Ofiri.

¹⁰Tamvera, mwana wamkaziwe, taona, tachera khutu lako; Uiwalenso mtundu wako ndi nyumba ya atate wako;

¹¹Potero mfumuyo adzakhumba kukoma kwako: Pakuti ndiye mbuye wako; ndipo iwe umgwadire iye.

¹²Ndipo mwana wamkazi wa Turo adzafika nayo mphatso; Acuma a mwa anthu adzapempha kudziwika nanu.

¹³Mwana wamkazi wa mfumu ngwa ulemerero wonse m'kati mwa nyumba: Zobvala zace nza made agolidi.

¹⁴Adzamtsogolera kwa mfumu wabvala zamawanga-mawanga: Anamwali anzace omtsata adzafika nao kwa inu.

¹⁵Adzawatsogolera ndi cimwemwe ndi kusekerera: Adzalowa m'nyumba ya mfumu.

¹⁶M'malo mwa makolo ako mudzakhala ana ako, Udzawaika akhale mafumu m'dziko lonse lapansi.

¹⁷Ndidzawakumbutsa dzina lanu m'mibadwo mibadwo: Cifukwa cace mitundu ya anthu idzayamika Inu ku nthawi za nthawi.