Read Buku Lopatulik Masalmo 48 Bible Online

Masalmo 48 - Buku Lopatulik bible

Masalmo 48

¹Yehova ndiye wamkulu, ayenera kulemekezekadi, M'mudzi wa Mulungu wathu, m'phiri lace loyera.

²Phiri la Ziyoni, cikhalidwe cace ncokoma Ku mbali zace za kumpoto, Ndilo cimwemwe ca dziko lonse lapansi, Mudzi wa mfumu yaikuru.

³Mulungu adziwika m'zinyumba zace ngati msanje.

⁴Pakuti, taonani, mafumuwo anasonkhana, Anapitira pamodzi.

⁵Anapenya mudziwo, ndipo pamenepo anadabwa; Anaopsedwa, nathawako.

⁶Pomwepo anagwidwa nako kunthunthumira; Anamva cowawa, ngati wam'cikuta.

⁷Muswa zombo za ku Tarisi ndi mphepo ya kum'mawa.

⁸Monga tidamva, momwemo tidapenya M'mudzi wa Yehova wa makamu, m'mudzi wa Mulungu wathu: Mulungu adzaukhazikitsa ku nthawi yamuyaya.

⁹Tidalingalira za cifundo canu, Mulungu, M'kati mwa Kacisi wanu.

¹⁰Monga dzina lanu, Mulungu, Momwemo lemekezo lanu ku malekezero a dziko lapansi: M'dzanja lamanja lanu mudzala cilungamo.

¹¹Likondwere phiri la Ziyoni, Asekere ana akazi a Yuda, Cifukwa ca maweruzo anu.

¹²Zungulirani Ziyoni, ndipo muuzinge; Werengani nsanja zace.

¹³Penyetsetsani malinga ace, Yesetsani zinyumba zace; Kuti mukaziwerengere mibadwo ikudza m'mbuyo.

¹⁴Pakuti Mulungu ameneyo ndiye Mulungu wathu ku nthawi za nthawi: Adzatitsogolera kufikira imfa.