Read Buku Lopatulik Masalmo 49 Bible Online

Masalmo 49 - Buku Lopatulik bible

Masalmo 49

¹Dzamveni kuno, anthu inu nonse; Cherani khutu, inu nonse amakono,

²Awamba ndi omveka omwe, Acuma ndi aumphawi omwe.

³Pakamwa panga padzanena zanzeru; Ndipo cilingiriro ca mtima wanga cidzakhala ca cidziwitso.

⁴Ndidzachera khutu kufanizo: Ndidzafotokozera cophiphiritsa canga poyimbira.

⁵Ndidzaoperanji masiku oipa, Pondizinga amphulupulu onditsata kucidendene?

⁶Iwo akutama kulemera kwao; Nadzitamandira pa kucuruka kwa cuma cao;

⁷Kuombola mbale sangadzamuombole, Kapena kumperekera dipo kwa Mulungu:

⁸(Popeza ciombolo ca moyo wao nca mtengo wace wapatali, Ndipo cilekeke nthawi zonse)

⁹Kuti akhale ndi moyo osafa, Osaona cibvundi.

¹⁰Pakuti aona anzeru amafa, Monga aonongekera wopusa, wodyerera momwemo, Nasiyira ena cuma cao.

¹¹Mumtima mwao ayesa kuti nyumba zao zikhala cikhalire, Ndi mokhala iwo ku mibadwo mibadwo; Achapo dzina lao padziko pao.

¹²Koma munthu wa ulemu wace sakhalitsa: Afanana ndi nyama za kuthengo, afanana nazo.

¹³Njira yao yino ndiyo kupusa kwao: Koma akudza m'mbuyo abvomereza mau ao.

¹⁴Aikidwa m'manda ngati nkhosa; Mbusa wao ndi imfa: Ndipo m'mawa mwace oongoka mtima adzakhala mafumu ao; Ndipo maonekedwe ao adzanyekera kumanda, kuti pokhala pace padzasowa.

¹⁵Koma Mulungu adzaombola moyo wanga ku mphamvu ya manda: Pakuti adzandilandira ine.

¹⁶Usaope polemezedwa munthu, Pocuruka ulemu wa nyumba yace;

¹⁷Pakuti pomwalira iye sadzamuka nako kanthu kali konse; Ulemu wace sutsika naye kumtsata m'mbuyo.

¹⁸Angakhale anadalitsa moyo wace pokhala ndi moyo, Ndipo anthu akulemekeza iwe, podzicitira wekha zokoma,

¹⁹Adzamuka ku mbadwo wa makolo ace; Sadzaona kuunika nthawi zonse.

²⁰Munthu waulemu, koma wosadziwitsa, Afanana ndi nyama za kuthengo, afanana nazo.