Read Buku Lopatulik Masalmo 5 Bible Online

Masalmo 5 - Buku Lopatulik bible

Masalmo 5

¹Mverani mau anga, Yehova, Zindikirani kulingirira kwanga.

²Tamvetsani mau a kupfuula kwanga, Mfumu yanga, ndi Mulungu wanga: Pakuti kwa Inu ndimapemphera,

³M'mawa, Yehova, mudzamva mau anga; M'mawa, ndidzakukonzerani pemphero langa, ndipo ndidzadikira.

⁴Pakuti Inu sindinu Mulungu wakukondwera naco coipa Mphulupulu siikhala ndi Inu.

⁵Opusa sadzakhazikika pamaso panu: Mudana nao onse akucita zopanda pace.

⁶Mudzaononga iwo akunena bodza: Munthu wokhetsa mwazi ndi wacinyengo, Yehova anyansidwa naye.

⁷Koma ine, mwa kucuruka kwa cifundo canu ndidzalowa m'nyumba yanu: Ndidzagwada kuyang'ana Kacisi wanu woyera ndi kuopa Inu.

⁸Yehova, munditsogolere m'cilungamo canu, cifukwa ca akundizondawo; Mulungamitse njira yanu pamaso panga.

⁹Pakuti m'kamwa mwao mulibe mau okhazikika; M'kati mwao m'mosakaza; M'mero mwao ndi manda apululu: Lilime lao asyasyalika nalo.

¹⁰Muwayese otsutsika Mulungu; Agwe nao uphungu wao: M'kucuruka kwa zolakwa zao muwapitikitse; Pakuti anapikisana ndi Inu.

¹¹Koma akondwere onse amene athawira kwa Inu, Apfuule mokondwera kosaleka, popeza muwafungatira; Nasekere mwa Inu iwo akukonda dzina lanu.

¹²Pakuti Inu, Yehova, mudzadalitsa wolungamayo; Mudzamcinjiriza naco cibvomerezo ngati cikopa.