Read Buku Lopatulik Masalmo 51 Bible Online

Masalmo 51 - Buku Lopatulik bible

Masalmo 51

¹Mundicitire ine cifundo, Mulungu, Monga mwa kukoma mtima kwanu; Monga mwa unyinji wa nsoni zokoma zanu Mufafanize macimo anga.

²Mubwereze kunditsuka mphulupulu yanga, Ndipo mundiyeretse kundicotsera coipa canga,

³Cifukwa ndazindikira macimo anga; Ndipo coipa canga ciri pamaso panga cikhalire:

⁴Pa Inu, Inu nokha, ndinacimwa, Ndipo ndinacicita coipaco pamaso panu: Kuti mukhale wolungama pakulankhula Inu, Mukhalenso woyera pa kuweruza kwanu.

⁵Onani, ndinabadwa m'mphulupulu: Ndipo mai wanga anandilandira m'zoipa.

⁶Onani, Inu mukondwera ndi zoonadi m'malo a m'katimo; Ndipo m'malo a m'tseri mudzandidziwitsa nzeru.

⁷Mundiyeretse ndi hisope ndipo ndidzayera; Munditsuke ndipo ndidzakhala wa mbu woposa matalala.

⁸Mundimvetse cimwemwe ndi kusekera: Kuti mafupawo munawatyola akondwere.

⁹Muzibisire nkhope yanu zolakwa zanga, Ndipo mufafanize mphulupulu zanga zonse.

¹⁰Mundilengere mtima woyera, Mulungu; Mukonze mzimu wokhazikika m'kati mwanga.

¹¹Musanditaye kundicotsa pamaso panu; Musandicotsere Mzimu wanu Woyera.

¹²Mundibwezere cimwemwe ca cipulumutso canu; Ndipo mzimu wakulola undigwirizize.

¹³Pomwepo ndidzalangiza ocimwa njira zanu; Ndipo olakwa adzabwera kwa Inu.

¹⁴Mundilanditse ku mlandu wa mwazi, Mulungu, Ndinu Mulungu wa cipulumutso canga; Lilime langalidzakweza Nyimbo ya cilungamo canu.

¹⁵Ambuye, tsegulani pa milomo yanga; Ndipo pakamwa panga padzalalikira ulemekezo wanu.

¹⁶Pakuti simukondwera ndi nsembe, mwenzi nditapereka; Nsembe yopsereza simuikonda.

¹⁷Nsembe za Mulungu ndizo mzimu wosweka; Inu, Mulungu, simudzaupeputsa mtima wosweka ndi wolapa.

¹⁸Citirani Ziyoni cokoma monga mwa kukondwera kwanu; Mumange malinga a miyala a Yerusalemu.

¹⁹Pamenepo mudzakondwera nazo nsembe zacilungamo, Ndi nsembe yopsereza ndi yopsereza yathunthu: Pamenepo adzapereka Ng'ombe pa guwa lanu la nsembe.