Read Buku Lopatulik Masalmo 55 Bible Online

Masalmo 55 - Buku Lopatulik bible

Masalmo 55

¹Cherani khutu pemphero langa, Mulungu; Ndipo musadzibisa pa kupemba kwanga.

²Mveram, ndipo mundiyankhe: Ndiliralira m'kudandaula kwanga ndi kubuula;

³Cifukwa ca mau a mdani, Cifukwa ca kundipsinja woipa; Pakuti andisenza zopanda pace, Ndipo adana nane mumkwiyo.

⁴Mtima wanga uwawa m'kati mwanga; Ndipo zoopsa za imfa zandigwera.

⁵Mantha ndi kunjenjemera zandidzera, Ndipo zoopsetsa zandikuta.

⁶Ndipo ndinati, Ha, wina akadandipatsa mapiko onga a njiwa Mwenzi nditauluka, ndi kukhaliratu.

⁷Onani, ndikadathawira kutari, Ndikadagona m'cipululu.

⁸Ndikadafulumira ndipulumuke Ku mphepo yolimba ndi namondwe.

⁹Aonongeni, Ambuye, gawani lilime lao: Pakuti ndaona ciwawa ndi ndeu m'mudzimo.

¹⁰Izizo ziuzungulira pa malinga ace usana ndi usiku; Ndipo m'kati mwace muli zapanda pace ndi cobvuta.

¹¹M'kati mwace muli kusakaza: Ciwawa ndi cinyengo sizicoka m'makwalala ace.

¹²Pakuti si mdani amene ananditonzayo; Pakadatero ndikadacilola: Amene anadzikuza pa ine sindiye munthu wondida; Pakadatero ndikadambisalira:

¹³Koma ameneyo ndiwe, munthu woyenerana nane, Tsamwali wanga, wodziwana nane.

¹⁴Tinapangirana upo wokoma, Tinaperekeza khamu la anthu popita ku nyumba ya Mulungu.

¹⁵Imfa iwagwere modzidzimutsa, Atsikire kumanda ali amoyo: Pakuti m'mokhala mwao muli zoipa pakati pao,

¹⁶Koma ine ndidzapfuulira kwa Mulungu; Ndipo Yehova atizandipulumutsa.

¹⁷Madzulo, m'mawa, ndi msana ndidzadandaula, ndi kubuula, Ndipo adzamva mau anga.

¹⁸Anaombola moyo wanga ku nkhondo yondilaka, ndikhale mumtendere: Pakuti ndiwo ambiri okangana nane.

¹⁹Mulungu adzamva, nadzawasautsa, Ndiye wokhalabe ciyambire kale lomwe. Popeza iwowa sasinthika konse, Ndipo saopa Mulungu.

²⁰Anaturutsa manja ace awagwire iwo akuyanjana naye: Anaipsa pangano lace.

²¹Pakamwa pace mposalala ngati mafuta amkaka, Koma mumtima mwace munali nkhondo: Mau ace ngofewa ngati mafuta oyenga, Koma anali malupanga osololasolola.

²²Umsenze Yehova nkhawa zako, ndipo Iyeadzakugwiriziza: Nthawi zonse sadzalola wolungama agwedezeke.

²³Koma Inu, Mulungu, mudzawatsitsira ku dzenje la cionongeko: Anthu okhetsa mwazi ndi acinyengo masiku ao sadzafikira nusu; Koma ine ndidzakhulupirira Inu.