Read Buku Lopatulik Masalmo 59 Bible Online

Masalmo 59 - Buku Lopatulik bible

Masalmo 59

¹Ndilanditseni kwa adani anga, Mulungu wanga: Ndiikeni pamsanje kwa iwo akundiukira.

²Mundilanditse kwa ocita zopanda pace, Ndipo ndipulumutseni kwa anthu olira mwazi.

³Pakuti onani, alalira moyo wanga; Amphamvu andipangira ciwembu: Osacimwa, osalakwa ine, Yehova,

⁴Osawapatsa cifukwa ine, athamanga nadzikonza; Galamukani kukomana nane, ndipo penyani.

⁵Ndinu Yehova, Mulungu wa makamu, Mulungu wa Israyeli, Ukani kukazonda amitundu onse: Musacitire cifundo mmodzi yense wakucita zopanda pace monyenga.

⁶Abwera madzulo, auwa ngati garu, Nazungulira mudzi.

⁷Onani abwetuka pakamwa pao; M'milomo mwao muli lupanga, Pakuti amati, Amva ndani?

⁸Koma Inu, Yehova, mudzawaseka; Mudzalalatira amitundu onse.

⁹Inu, mphamvu yanga, ndidzakulindirani; Pakuti Mulungu ndiye msanje wanga.

¹⁰Mulungu wa cifundo canga adzandikumika: Adzandionetsa tsoka la adani anga.

¹¹Musawapheretu, angaiwale anthu anga: Muwabalalitse mwa mphamvu yanu, ndipo muwagwetse, Ambuye, ndinu cikopa cathu.

¹²Pakamwa pao acimwa ndi mau onse a pa milomo yao, Potero akodwe m'kudzitamandira kwao, Ndiponso cifukwa ca kutemberera ndi bodza azilankhula.

¹³Muwathe mumkwiyo, muwagurule psiti: Ndipo adziwe kuti Mulungu ndiye woweruza m'Yakobo, Kufikira malekezero a dziko la pansi.

¹⁴Ndipo abwere madzulo, auwe ngati garu, Nazungulire mudzi.

¹⁵Ayendeyende ndi kufuna cakudya, Nacezere osakhuta.

¹⁶Koma ine, ndidzayimbira mphamvu yanu; Inde ndidzayimbitsa cifundo canu mamawa: Pakuti Inu mwakhala msanje wanga, Ndi pothawirapo ine tsiku la nsautso yanga.

¹⁷Ndidzayimbira zakukulemekezani Inu, mphamvu yanga: Pakuti Mulungu ndiye msanje wanga, Mulungu wa cifundo canga.