Read Buku Lopatulik Masalmo 63 Bible Online

Masalmo 63 - Buku Lopatulik bible

Masalmo 63

¹Inu Mulungu, ndinu Mulungu wanga; ndidzakufunani m'matanda kuca: Moyo wanga ukumva ludzu la kwa Inu, thupi langa lilirira Inu, M'dziko louma ndi lotopetsa, lopanda madzi.

²Kuti ndione mphamvu yanu ndi ulemerero wanu, Monga ndinakuonani m'malo oyera.

³Pakuti cifundo canu ciposa moyo makomedwe ace; Milomo yanga idzakulemekezani.

⁴Potero ndidzakuyamikani m'moyo mwanga; Ndidzakweza manja anga m'dzina lanu.

⁵Mudzakhutitsa moyo wanga ngati ndi mafuta ndi zonona; Ndipo pakamwa panga ndidzakulemekezani ndi milomo yakupfuula mokondwera;

⁶Pokumbukira Inu pa kama wanga, Ndi kulingalira za Inu maulonda a usiku.

⁷Pakuti munakhala mthandizi wanga; Ndipo ndidzapfuula mokondwera mu mthunzi wa mapiko anu.

⁸Moyo wanga uumirira Inu: Dzanja lamanja lanu lindigwiriziza.

⁹Koma iwo amene afuna moyo wanga kuti auononge, Adzalowa m'munsi mwace mwa dziko.

¹⁰Adzawapereka ku mphamvu ya lupanga; Iwo adzakhala gawo la ankhandwe.

¹¹Koma mfumu idzakondwera mwa Mulungu; Yense wakulumbirira iye adzatamandira; Pakuti pakamwa pa iwo onena bodza padzatsekedwa.