Read Buku Lopatulik Masalmo 69 Bible Online

Masalmo 69 - Buku Lopatulik bible

Masalmo 69

¹Ndipulumutseni Mulungu; Pakuti madzi afikira moyo wanga.

²Ndamira m'thope lozama, lopanda poponderapo; Ndalowa m'madzi ozama, ndipo cigumula candimiza.

³Ndalema ndi kupfuula kwanga; kum'mero kwauma gwa: M'maso mwanga mwada poyembekeza Mulungu wanga.

⁴Ondida kopanda cifukwa acuruka koposa tsitsi la pamutu panga; Ofuna kunditha, ndiwo adani anga monama, ali ndi mphamvu: Pamenepo andibwezetsa cosafunkha ine.

⁵Mulungu, mudziwa kupusa kwanga; Ndipo kutsutsika kwanga sikubisikira Inu.

⁶Iwo akuyembekeza Inu, Ambuve Yehova wa makamu, asacite manyazi cifukwa ca ine: Iwo ofuna Inu, Mulungu wa Israyeli, asapepulidwe cifukwa ca ine.

⁷Pakuti ndalola cotonza cifukwa ca Inu: Cimpepulo cakuta nkhope yanga,

⁸Abale anga andiyesa mlendo, Ndi ana a mai wanga andiyesa wa mtundu wina.

⁹Pakuti cangu ca pa nyumba yanu candidya; Ndi zotonza za iwo otonza Inu zandigwera ine.

¹⁰Ndipo ndinalira pa kusala kwa moyo wanga, Koma uku kunandikhalira cotonza.

¹¹Ndipo cobvala canga ndinayesa ciguduli, Koma amandiphera mwambi.

¹²Okhala pacipata akamba za ine; Ndipo oledzera andiyimba.

¹³Koma ine, pemphero langa liri kwa Inu, Yehova, m'nyengo yolandirika; Mulungu, mwa cifundo canu cacikuru, Mundibvomereze ndi coonadi ca cipulumutso canu.

¹⁴Mundilanditse kuthope, ndisamiremo: Ndilanditseni kwa iwo akundida, ndi kwa madzi ozama.

¹⁵Cigumula cisandifotsere, Ndipo cakuya cisandimize; Ndipo asanditsekere pakamwa pace pa dzenje.

¹⁶Mundiyankhe Yehova; pakuti cifundo canu ncokoma; Munditembenukire monga mwa unyinji wa nsoni zokoma zanu.

¹⁷Ndipo musabisire nkhope yanu mtumiki wanu; Pakuti ndisautsika ine; mundiyankhe msanga.

¹⁸Yandikizani moyo wanga, ndi kuuombola; Ndipulumutseni cifukwa ca adani anga,

¹⁹Mudziwa cotonza canga, ndi manyazi anga, ndi cimpepulo canga: Akundisautsa ali pamaso panu,

²⁰Cotonza candiswera mtima, ndipo ndidwala ine; Ndipo ndinayembekeza wina wondicitira cifundo, koma palibe; Ndinayembekeza onditonthoza mtima, osawapeza.

²¹Ndipo anandipatsa ndulu ikhale cakudya canga; Nandimwetsa vinyo wosasa pomva ludzu ine.

²²Gome lao likhale msampha pamaso pao; Pokhala ndi mtendere iwo, likhale khwekhwe.

²³M'maso mwao mude, kuti asapenye; Ndipo munjenjemeretse m'cuuno mwao kosalekeza.

²⁴Muwatsanulire mkwiyo wanu, Ndipo moto wa ukali wanu uwagwere.

²⁵Pokhala pao pakhale bwinja; M'mahema mwao musakhale munthu.

²⁶Pakuti alondola amene Inu munampanda; Ndipo akambirana za zowawa zao za iwo amene munawalasa.

²⁷Onjezani mphulupulu pa mphulupulu zao; Ndipo asafikire cilungamo canu.

²⁸Afafanizidwe m'buku lamoyo, Ndipo asalembedwe pamodzi ndi olungama,

²⁹Koma ine ndine wozunzika ndi womva zowawa; Cipulumutso canu, Mulungu, cindikweze pamsanje.

³⁰Ndidzalemekeza dzina la Mulungu ndi kuliyimbira, Ndipo ndidzambukitsa ndi kumyamika.

³¹Ndipo cidzakomera Yehova koposa ng'ombe, Inde mphongo za nyanga ndi ziboda,

³²Ofatsa anaciona, nakondwera: Ndipo inu, ofuna Mulungu, mtima wanu ukhale ndi moyo.

³³Pakuti Yehova amvera aumphawi, Ndipo sapeputsa am'ndende ace.

³⁴Zakumwamba ndi dziko lapansi zimlemekeze, Nyanja ndi zonse zoyenda m'mwemo;

³⁵Pakuti Mulungu adzapulumutsa Ziyoni, nadzamanga midzi ya Yuda; Ndipo iwo adzakhala komweko, likhale lao lao.

³⁶Ndipo mbumba ya atumiki ace idzalilandira; Ndipo iwo akukonda dzina lace adzakhalam'mwemo.