Read Buku Lopatulik Masalmo 7 Bible Online

Masalmo 7 - Buku Lopatulik bible

Masalmo 7

¹Yehova Mulungu wanga, ndakhulupirira Inu: Mundipulumutse kwa onse akundilonda, nimundilanditse;

²Kuti angamwetule moyo wanga ngati mkango, Ndi kuukadzula, wopanda wina wondilanditsa.

³Yehova Mulungu wanga, ngati ndacita ici; Ngati m'manja anga muli cosalungama;

⁴Ngati ndambwezera coipa iye woyanjana ndine; (Inde, ndamlanditsa wondisautsa kopanda cifukwa);

⁵Mdani alondole moyo wanga, naupeze; Naupondereze pansi moyo wanga, Naukhalitse ulemu wanga m'pfumbi.

⁶Ukani Yehova mu mkwiyo wanu, Nyamukani cifukwa ca ukali wa akundisautsa: Ndipo mugalamukire ine; mwalamulira ciweruzo.

⁷Ndipo ukuzingeni msonkhano wa anthu; Ndipo pamwamba pao mubwerere kumka kumwamba.

⁸Yehova aweruza anthu mlandu: Mundiweruze, Yehova, monga mwa cilungamo canga, ndi ungwiro wanga uli mwa ine.

⁹Ithe mphulupulu ya anthu oipa, ndikupemphani, koma wolungamayo mumkhazikitse: Pakuti woyesa mitima ndi imso ndiye Mulungu wolungama.

¹⁰Cikopa canga ciri ndi Mulungu, Wopulumutsa oongoka mtima.

¹¹Mulungu ndiye Woweruza walungama, Ndiye Mulungu wakukwiya masiku onse.

¹²Akapanda kutembenuka munthu, Iye adzanola lupanga lace; Wakoka uta wace, naupiringidza.

¹³Ndipo anamkonzera zida za imfa; Mibvi yace aipanga ikhale yansakali,

¹⁴Taonani, ali m'cikuta ca zopanda pace; Anaima ndi cobvuta, nabala bodza.

¹⁵Anacita dzenje, nalikumba, Nagwa m'mbuna yomwe anaikumba.

¹⁶Cobvuta cace cidzambwerera mwini, Ndi ciwawa cace cidzamgwera pakati pamutu pace.

¹⁷Ndidzayamika Yehova monga mwa cilungamo cace; Ndipo ndidzayimbira Yehova Wam'mwambamwamba.